7 мыңнан астам жүк вагоны жөндеуден өтті
Осы жылдың басынан бері «Қазтеміртранс» АҚ меншігіндегі 7012 жүк вагонында деполық жөндеу жұмыстары жүргізілді, деп хабарлайды Rail-news.kz.
Әр жылға арналған мерзімді жоспарлы жөндеу қажеттілігі вагон паркінің жағдайын ескере отырып белгіленеді. Пайдаланудағы вагон паркінің техникалық жай-күйі вагондардың сенімділігімен, жоспарлы жөндеу түрлерінің сапасымен және басқа да сипаттамаларымен айқындалады.
2020 жылдан бастап «Қазтеміртранс» АҚ меншігіндегі жүк вагондарын жөндеу «ТемірТранссервис» ЖШС тұлғасында заңды тұлғалардың уақытша бірлестігімен («ТеміртрансСервис» ЖШС және «Astana Railway Services» ЖШС) жасалған жүк вагондарына сервистік қызмет көрсету бойынша жұмыстарды ұзақ мерзімді сатып алу туралы шарт бойынша жүргізіледі. Бұл бірқатар негізгі емес функцияларды алып тастауға және жұмыс істемейтін парктің өсіп кету қаупін азайтуға мүмкіндік берді.
- 2022 жылғы 20 қарашадағы жағдай бойынша жүк вагондарына күрделі жөндеу 104%-ке орындалды, жоспар бойынша 552 вагон орнына 575 вагон жөнделді. 2022 жылға барлығы 641 вагонды күрделі жөндеуден өткізу жоспарланған, - деді «Қазтеміртранс» АҚ бас инженері Нұрлан Жүсіпов.