Алматыда ҚТЖ қолдауымен 5G байланыс жүйелерін дамыту бойынша құзыреттілік орталығы ашылды
Қ. Сәтбаев атындағы Автоматика және ақпараттық технологиялар институты базасында 5G байланыс жүйелерін дамыту және өндіру жөніндегі құзыреттілік орталығы ашылды, деп хабарлайды Rail-news.kz.
Орталықтың қызметі отандық цифрлық байланыс жүйелерін дамытуға және өндіруге, студенттерді цифрлық байланыс жүйелері саласындағы тәжірибеге бағытталған пәндерге тартуға бағытталған.
«ҚТЖ» ҰК» АҚ бас инженері – Техникалық саясат департаментінің директоры Батыр Котырев осы жобаның теміржол саласы үшін маңыздылығын алға тарта отырып, Құзырет орталығы ҚР Президентінің ғылым мен өндірістің өзара әрекеттесуін жедел дамытуға шақырған Жолдауының іс жүзінде іске асуы болып табылатынын атап көрсетті.
"Қ. Сәтбаев атындағы Институт Қазақстан инженерлерінің талбесігіне ғана емес, сонымен қатар 5G байланыс жүйелерін - жаңа буынның ең заманауи байланысын дамыту бойынша құзыреттер орталығына айналды. Бұл әрбір байланысшының арманы", - деп атап өтті ҚТЖ бас инженері.
Институттың ғылым және халықаралық ынтымақтастық жөніндегі проректоры Әлібек Шоқпаров бірлескен құзыреттілік орталығын ашу идеясын бір жылдан астам талқылағанын атап өтті.
"Студенттеріміз теміржол саласының телекоммуникациялық технологияларын дамытуға өз үлестерін қосатынына сенімдімін", - деді Әлібек Шоқпаров.
ҚТЖ сымсыз байланыс жүйесін жаңғырту, сондай-ақ цифрлық арналар арқылы деректерді беру және интернет-шешімдерді дамыту бойынша белсенді жұмыс жүргізуде, бұл темір жолдарда қозғалыс қауіпсіздігінің деңгейін едәуір арттыруға мүмкіндік береді.