Жамбыл облысында дауылдан кейінгі қалпына келтіру жұмыстары жүріп жатыр

Жыл басында Жамбыл жұртшылығын әбігерге түсірген дауыл кезінде Жаңатас станциясында электр бағаналары құлап, Табақбұлақ станциясында Жамбыл белгі беру және байланыс дистанциясына қарасты ғимараттың шатыры ұшып кеткен.

Жедел құрылған аудандық штабтың шешімімен мердігерлер анықталып, құлаған бағаналар жергілікті әкімдіктің көмегімен қалпына келтірілді. Ал Жамбыл – Жаңатас телімінде орналасқан шағын Табақбұлақ станциясындағы ғимараттың шатырын қалпына келтіруді дистанциялықтар өз мойнына алып, 4 күннің ішінде бітірді. Қаратау станциясындағы вокзал ғимаратына жапсарласа орналасқан ғимараттың да шатыры ұшқан еді. Бұл ғимаратта тауар кассирлері, жүк қабылдап-өткізушілер, т.б. отырады. Қалпына келтіру жұмысын аудан әкімдігі өз мойнына алды. Қаратау станциясы бастығының орынбасары Ғалымжан Сайлаубектің айтуынша, қазір мердігер компания жұмыс жүргізіп жатыр.  

– 7 қаңтар күні Қаратау қаласында штаб отырысын өткізген облыс әкімі бұл жұмыстар 16 қаңтарға дейін аяқталуы керектігін айтқан болатын. Амандық болса, сол мерзімде жұмыстар аяқталады, – дейді Ғалымжан Сайлаубек.  

Сонымен қатар Қаратау станциясындағы Жамбыл жол дистанциясына қарасты ғимараттың да шатыры ұшыпты, алайда жолшылар екі күннің ішінде оны өз күштерімен қайта жапты.  

Бүгінгі күні Жамбыл белгі беру және байланыс, жол дистанцияларының шатырларды жөндеуге кеткен құрылыс материалдарының шығынын өтеу үшін Жамбыл магистральдық желі бөлімшесінің басшылығы төтенше жағдайға орай құрылған облыстық штабқа шығын көлемін есептеп, хат жолдап отыр. Өйткені, нормативтік заңнамалар негізінде Төтенше жағдай жарияланған кезде резервтік қордан бөлінетін қаржы көздері арқылы шығынды өтеуге мүмкіндік бар.