Соғыста теміржолшылардың ерлігі ерен болды
"Қазақстан теміржолшысы" газетінің тілшісі
7 мамыр – Отан қорғаушылар күні мен 9 мамыр – Жеңіс күніне орай М.Тынышбаев атындағы Ақмола темір жол колледжінің студенттері теміржолшы ардагерлерді шақырып мерекелік шара өткізді. Жиынға Ауған соғысы мен Чернобыль апатын залалсыздандыруға қатысқан теміржолшылар келді.
Аталған жиын соғыста құрбан болған жауынгерлерді еске алу үшін бір минуттық үнсіздікпен басталды. Осыдан кейін жиналғандарға Екінші дүниежүзілік соғыс жайлы түсірілген деректі фильмнен үзінділер көрсетіліп, студенттер соғыс кезінде шыққан әндерді шырқап, монологтар оқыды. Ардагерлер сөз алып теміржолшылардың алапат соғыста атқарған ерен еңбектеріне тоқталып, қазіргі бейбіт заманды бағалай білуге үндеді. Теміржол қызметінің қыр-сырын жайлы айтып, өздерінің өмірлік тәжірибелерімен де бөлісті. Темір жолда 40 жылдан астам уақыт жұмыс істеген Рашид Мұқатовтың әкесі соғыс кезінде пойыз тізгіндеген екен. Теміржолшы әкесінің соғыс жайлы айтқан естеліктерімен бөлісті.
Ұлы Отан соғысы кезіндегі теміржолшылардың еңбегін ештеңемен салыстыруға болмайды. Олар соғыс жүріп жатқан ұрыс даласына қираған теміржолдар мен көпірлерді қалпына келтіріп, майдан даласына әскери техника, оқ-дәрі, азық-түлік, киім-кешек жеткізіп, кері қайтқанда жаралыларды әкетіп отырды.
«Мен 2000 жылдары ҚТЖ-ның Әлеуметтік саясат басқармасында бас маман болып жұмыс істеген кезімде темір жолда 486 адам Жол қатынастары халық комиссариаты бойынша соғыста болғанын анықтадым. Олар негізінен локомотив машинистері мен көмекшілері еді. Бұлар теміржолдың элитасы саналған, өйткені соғыс уақытында қабылданған шешім бойынша ұрыс даласы мен тылды жалғаған солар болды», – деді «ҚАЗКӨЛІККӘСІП» ҚБ-нің «Астана» филиалының төрағасы Серік Сәрсекеев студенттермен кездесу барысын.
Сондай-ақ Ауған соғысы мен Чернобыль апатын залалсыздандыруға қатысқан ардагерлер ол жаққа қалай тап болғандарын баяндап берді. Ауған соғысына қатысқан Ідіріс Алдаңғаров Қызылорда депосында жұмыс істеп жүрген жерінен соғысқа аттаныпты. Мектепті бітірген соң МПТУ-де білім алып, машинист көмекшісі болып жүрген. Алайда, 1981 жылы шұғыл әскер қатарына алынып, таулы ауған жеріне кете барыпты.
«Соғыстан дін аман келдім және бұрынғы депомда жұмысымды жалғастырдым. Слесарь болып тәжірибе жинадым, 2006 жылдан бастап машинистің көмекшісі, кейін машинист болдым. 2019 жылы зейнетке шықтым», – деп еңбек жолын еске алды теміржолшы.
Сөз арасында Ідіріс Алдаңғаров қазір теміржолшылардың жалақысы өскенін және техникалар да уақыт өткен сайын жаңартылып жатқанын айтып, студенттерді таңдаған мамандықтары бойынша жұмыс істеуге шақырды.
«Қазір машинистердің екбекақысы өте жақсы. Орташа жалақы 300-400 мың теңге, тіптен одан көп алатындар бар. Сондықтан бұл мамандықтан қашпай, сапалы білім алып, теміржолшы болуға тырысыңдар. Қазіргі локомотивтер де керемет. 1980 жылдары мен көмекші болып жүргенде тепловоздарға су, майды қолмен тасып құятын едік. Оның бәрі артта қалды. Бүгінде технология дамыған, тетікті басып қойып отыра бересің, тек жолға мұқият қарап отырсаң болғаны», – дейді ардагер.
Жылы жүздесуде ғибратты әңгіме тыңдаған студент жастар атынан ұстаздары алғыс айтып, ардагерлерге мықты денсаулық, бақуатты да ұзақ өмір тіледі. Кездесуге ұйымдастыруға ұйытқы болған Астана ардагерлер кеңесі өкілдері де қонақтарға алғыстарын жеткізіп, сый сыяпат жасады.
