Құжаттама талабы – сауаттылық (Фото)

«ҚТЖ-Жүк тасымалы» ЖШС-нің ұйымдастыруымен Жамбылда екі күндік семинар өтті. Іс-шарада станциялардағы нормативтік-технологиялық құжаттама жасау және енгізу мәселесі көтерілді. Басқосуға серіктестік филиалдарының инженерлік-техникалық қызметкерлері, қозғалыс қауіпсіздігін бақылаушылар, ірі станциялар басшылары мен нормативтік-технологиялық құжаттарды рәсімдеуші мамандар қатысты.

Жиынға Астанадан арнайы келген «Жүк тасымалы» ЖШС бас менеджері Рита Енсебаева бастаған мамандар күн тәртібіндегі мәселе бойынша баяндама жасап, көпшіліктің сұрақтарына жауап берді. Семинар жұмысына ЗУМ арқылы байланысқа шыққан «ҚТЖ» ҰҚ» АҚ Қозғалыс қауіпсіздігі департаментінің бас менеджері Руслан Молдағалиев пен «ҚТЖ-ЖТ» ЖШС Қозғалыс қауіпсіздігі департаментінің директоры Ерлан Бурхутов станцияларда нормативтік-технологиялық құжаттарды рәсімдеу және оның жаңа технологиялар негізінде дамыту жолдарына қатысты өз ұсыныстарын білдірді. Жалпы екі күн бойы мамандар станцияларда техникалық-басқару актісін дайындау жолы мен бизнес-жоспар жобаларын, сұрыптау паркіндегі қозғалыс қауіпсіздігі нұсқаулығын орындау шаралары бойынша қызу талқы болды.

– Екі күнгі іс-шарада көптеген мәселе тақыланды. Мен өз тарапымнан «Арыс-1 станциясына бұрыштамалық қосымша жол құрылысы» бизнес-жоспар жобасын ұсындым. Оның ұлттық компания үшін және еншілес компаниялар үшін тиімділігін таныстырдым. Жобаның негізгі стратегиялық мақсаты, жүзеге асқанда жүк өтімділік көлемі, экономикалық тиімділігі, жобадан күтілетін сандық және сапалық көрсеткіш, нақты есептерді ұсындым. Жүк көлемін арттыру мақсатында бұл бизнес-жоспар жобасы «ҚТЖ-Жүк тасымалы» ЖШС-не де берілген. Арыс-Тараз-Арыс-Сарыағаш-Арыс телімінде күрделі учаскелердің бар екенін ескерсек, ұлттық компания жұмысының тиімділігін арттыратын жаңа жобаны жүзеге асыру қажет деп санаймыз. Жалпы, бүгінгідей басқосулар жиі өтіп тұрса, бір-бірімізден үйренеріміз көп болмақ, – дейді Шымкент жүк тасымалы бөлімшесі техникалық бөлімінің жетекші инженері Людмила Квон.  

Семинарды қорытындылаған Рита Әбдіжәлелқызы нормативтік-технологиялық құжаттама сауаттылығы талқыланған жиын көпшілікке пайдалы болғанына сенім білдірді. Ортақ тақырып, талқылау барысында бірталай мәселелер шешімін тапса, тиімді ұсыныстарды өндіріске енгізу уақыт еншісінде екенін жеткізді. Сонымен қатар семинарды ұйымдастырған Жамбыл бөлімшесіне алғысын айтып, Жамбыл ЖТ бөлімшесінің директоры Молдахмет Қожабековке «ҚТЖ-Жүк тасымалы» ЖШС Бас директоры Марлен Көкірекбаевтың Алғыс хатын тапсырды.