ҚТЖ пойыз қауіпсіздігін арттыру үшін цифрлық технологияны енгізді
ҚТЖ қозғалыс қауіпсіздігі департаменті және ҚТЖ - “Бас есептеу орталығы" филиалы "Қозғалыс қауіпсіздігі" автоматтандырылған жүйесін және "Инфо – орталық" ақпараттық кешенін әзірледі, деп хабарлайды Rail-news.kz.
"Қозғалыс қауіпсіздігі" автоматтандырылған жүйесі (ҚҚ АЖ) екі модульден тұрады: "Қозғалыс қауіпсіздігі бойынша ревизор" автоматтандырылған жүйесі (ҚР АЖ) және "Қозғалыс қауіпсіздігі тәуекелдерін талдау" автоматтандырылған жүйесі (ТТ АЖ).
ҚР АЖ 2016 жылы тұрақты пайдалануға енгізілді және "Ревизор” автоматтандырылған жұмыс орны" жүйесінің орнына келді. Осының арқасында соңғы 10 жылдағы ҚТЖ желісіндегі қозғалыс қауіпсіздігі туралы ақпарат сақталды. "Қозғалыс қауіпсіздігі тәуекелдерін талдау" автоматтандырылған жүйесі биыл әзірленді. Ол қабылданған ауытқулар бойынша статистикалық мәліметтер негізінде тәуекелдерді талдайды және бағалайды.
ҚҚ АЖ адами факторды, қағазбастылықты жоюға, мамандардың жұмысын оңтайландыруға мүмкіндік береді. Сонымен қатар, жүйе еліміздің әртүрлі аймақтарынан алынған ақпаратты жедел өңдейді, пойыздар қозғалысының қауіпсіздігі үшін туындайтын тәуекел дәрежесін объективті бағалайды. Нақты уақыт режимінде ҚТЖ басшылығы жол бөлімшелері мен басқарудың барлық деңгейлеріндегі жекелеген бөлімшелер бойынша қозғалыс қауіпсіздігінің жай-күйі туралы ақпарат алуға мүмкіндігі бар.
"Инфо-орталық" ақпараттық кешені ҚТЖ және жол бөлімшелері басшыларын пайдалану жұмысы, жылжымалы құрамның жай-күйі, инфрақұрылым және қозғалыс қауіпсіздігі бойынша өзекті деректермен хабардар етуге арналған.
Кешен нақты уақыт режимінде жол бөлімшесі учаскелерін визуализациялауды қамтамасыз етеді, барлық жүйелердің деректерін интерактивті бақылау тақталары түрінде көрсетеді. Ақпаратты қабылдаудың ыңғайлылығы үшін жоспардың орындалуы/орындалмауы, қозғалыс қауіпсіздігінің бұзылуының төмендеуі/өсуі туралы түсті индикация қарастырылған.
Бүгінгі таңда Қызылорда, Ақтөбе, Шымкент, Қостанай жүк тасымалдау бөлімшелерінде кешенді тәжірибелік пайдалану аяқталды. Қалған бөлімшелерге және ҚТЖ корпоративтік деңгейіне тарату бойынша жұмыстар жүргізілуде.