Қазақстандық жүк жөнелтушілерге Баку – Тбилиси – Карс бағдарының мүмкіндіктері ұсынылды

"ҚТЖ" ҰК" АҚ  - "Интеграцияланған жоспарлау дирекциясы" филиалы және Әзірбайжан темір жолының өкілдері ұйымдастырған кеңесте жаңғыртудан кейінгі Баку – Тбилиси – Карс бағытының мүмкіндіктері таныстырылды. Іс-шараға қазақстандық жүк жөнелтушілер, салалық қауымдастық, "Атамекен" ҰКП өкілдері қатысты.  

Жаңғыртудан кейін Баку – Тбилиси – Карс маршрутының өткізу қабілеті 5 есе өсті: жылына 1-ден 5 миллион тоннаға дейін жүк. Магистральды электрлендіру толығымен аяқталды. Ахалкалаки станциясы қайта жаңартылды. Жоба Әзірбайжанның бастамасымен Орта дәліз бойынша жүк тасымалы құнын төмендету есебінен транзитті ұлғайту үшін іске асырылды. Маршрут Қара теңіз порттарын айналып өтіп, Азия мен Еуропа арасындағы жүктерді жеткізуді жеделдетуге мүмкіндік береді және теңіз бен автомобиль тасымалдарымен салыстырғанда үнемді болады.  

Жыл соңына дейін грузин және әзірбайжан тараптарының қатысуымен тарифтік саясат пен маршрут бойынша тасымалдау шарттарын қалыптастыруда жұмыс істейтін бірлескен кәсіпорын іске қосылады.

Жиында қатысушылар қазақстандық теміржолшылар мен жүк жөнелтушілердің айтылған пікірлерін ескере отырып, қосымша ақпарат алмасуға, сондай-ақ осы кездесулердің тәжірибесін жалғастыруға келісті.  

Осы жылдың 7 айында Қазақстан мен Әзірбайжан темір жолдары арасындағы тасымалдау динамикасы 37%, яғни 3,2 млн тоннаға дейін өсуді көрсетіп отыр. Транскаспий халықаралық көлік бағдары (ТХКБ) бойынша 1,9 млн тонна тасымалданды, бұл өткен жылдың сәйкес көрсеткішінен 23% жоғары.