Қытай Алматы көлік-логистикалық хаб құрылысына инвестиция салуда
2025 жылғы 19 ақпанда Үрімші қаласында ҚКП ОК Саяси Бюросының мүшесі, ҚХР ШҰАА Коммунистік партиясының хатшысы Ма Синжуй мырза "ҚТЖ" ҰК" АҚ Басқарма Төрағасы Н. Е. Сауранбаевты қабылдады, деп хабарлайды Rail-news.kz.
Ма Синжуй мырза ҚР мен ҚХР арасындағы теміржол тасымалының тұрақты өсу серпінін атап өтті, оның көлемі 2024 жылы рекордтық деңгейге – 32 млн тоннаға жетті.
Кездесуде бұған дейін талқыланған барлық мәселелер (Достық-Мойынты учаскесінде екінші жол салу, транзиттік жүктердің көлемін ұлғайту және т.б.) толық орындалғаны атап өтілді.
2025-2026 жылдарға арналған жоспарлар белгіленді, олардың ішінде: Алматы агломерациясында көлік-логистикалық хаб құру, Достық-Алашаңқай шекаралық өткелін дамыту және Бақты-Аягөз теміржол желісінің құрылысын жедел іске асыру. Көліктің барлық түрлерімен жүктерді тасымалдау мәселелерін жалпы үйлестіру үшін мемлекеттік органдардың қатысуымен аралас комиссия құру қажеттілігі атап өтілді.
Кеңесте ШҰАА басшылығы Қазақстанда көлік-логистикалық хаб құрылысына 1 млрд юань инвестициялау туралы шешім қабылдады.
Барлық талқыланған мәселелер бойынша жауапты тұлғалар тағайындалды және іске асырудың қысқа мерзімдері анықталды.