Астанада машинистер чемпионатының жүлдегерін салтанатты түрде қарсы алды
Елорда әуежайында «ҚТЖ-Жүк тасымалы» ЖШС Қызылорда локомотив депосының машинисі Смағұл Жасұланды салтанатты түрде қарсы алды. Ол Екатеринбург қаласында өткен ТМД елдері арасындағы кәсіби шеберлік бойынша халықаралық чемпионатта екінші орын иеленді, деп хабарлайды Rail-news.kz.
Жеңімпазды құттықтауға арнайы келген «ҚТЖ-Жүк тасымалы» ЖШС локомотив шаруашылығы жөніндегі бас директордың орынбасары Асан Умбетов Жасұланның жоғары кәсіби деңгейін және теміржол саласының беделін арттыруға қосқан зор үлесін атап өтті.
— Біздің машинистің бұл жетістігі – қазақстандық теміржолшылардың кәсіби біліктілігі шетелде де жоғары бағаланатынын айғақтайды. Біз оның табысына шын жүректен қуаныштымыз. Алда әлі талай жеңіс пен жетістік бар екеніне сенемін, – деді, Асан Умбетов.
Сонымен қатар, ол машинистің еңбегі қаншалықты күрделі екенін жақсы білетінін айтты. Ол да 10 жыл ішінде еңбек жолын тепловоз машинисінің көмекшісінен бастап, нұсқаушы-машинист қызметіне дейін көтеріліп, кейін Ақтөбе, Қандыағаш, Бурабай курорты және Павлодар пайдалану локомотив деполарында түрлі басшылық қызметтер атқарған. Кейін Қарағанды пайдалану локомотив депосын басқарған.