ҚТЖ-да отандық тауар өндірушілермен дөңгелек үстел өтті
ҚТЖ-да отандық тауар өндірушілердің, «Самұрық-Қазына Келісімшарт» ЖШС және «QazCloud» ЖШС өкілдерінің қатысуымен дөңгелек үстел өтті, деп хабарлайды Rail-news.kz.
Іс-шараның мақсаты – отандық тауар өндірушілердің сатып алуға қатысу рәсімдерін және «Самұрық-Қазына»АҚ Сатып алу тәртібінде көзделген оларды қолдау шараларын түсіндіру. Кездесуге қатысушыларға электрондық дүкеннің мүмкіндіктерін қоса алғанда, қолдаудың қолданыстағы тетіктері туралы ақпарат ұсынылды, сондай-ақ ҚТЖ, «Самұрық-Қазына Келісімшарт» ЖШС және «QazCloud» ЖШС өкілдері өздерін қызықтырған сұрақтарға жауап берді.
Отандық өндірісті қолдау бойынша жүргізіліп жатқан жұмыстар шеңберінде 2025 жылы ҚТЖ компаниялар тобы отандық тауар өндірушілермен 1 400 астам шарт жасасты. Қазіргі уақытта 2,8 трлн теңге сомасына 185 ұзақ мерзімді келісімшарт қолданыста. Соңғы бес жылда импортты алмастыру бағдарламасы шеңберінде 250 млрд теңгеден астам сомаға оффтейк-келісімшарттарға қол қойылды, оның ішінде 2025 жылы — 87,6 млрд теңгеге 17 шарт.
ҚТЖ-да отандық өндірісті дамытуға және импортқа тәуелділікті төмендетуге бағытталған жұмыстар тұрақты негізде жүргізілуде.