ҚТЖ мен Citibank: болашақ инфрақұрылымына инвестициялар
«Қазақстан темір жолы» ҰК» АҚ Басқарма төрағасы Талғат Алдыбергенов Нью-Йоркте (АҚШ) Citigroup бас атқарушы директоры Джейн Фрейзермен кездесу өткізді, деп хабарлайды Rail-news.kz.
Сонымен қатар, АҚШ-тағы ҚТЖ делегациясының өкілдері «Ситибанк Қазақстан» АҚ Басқарма төрағасы Сәуле Жақаевамен, Солтүстік және Оңтүстік Америка бойынша Citi экспорттық және агенттік қаржыландыру жөніндегі басқарушы директоры Суманта Паниграхимен және Citi экспорттық және агенттік қаржыландыру жөніндегі директоры Майкл Питерсонмен кездесуге қатысты.
Кездесулер барысында тараптар ҚТЖ инвестициялық бағдарламасын қаржыландыру мәселелерін және ынтымақтастықты кеңейту перспективаларын, оның ішінде Wabtec-пен қол қойылған келісім шеңберінде талқылады.
Компанияның теміржол инфрақұрылымын жаңғыртуға, операциялық тиімділікті арттыруға және инновациялық технологияларды енгізуге бағытталған стратегиялық жобаларын іске асыру үшін ұзақ мерзімді қаржыландыруды тарту мүмкіндіктеріне басты назар аударылды.
Келіссөздер барысында ҚТЖ және Citi өкілдері бірлескен жұмыстың жоғары әлеуетін атап өтіп, әріптестік қатынастарды одан әрі дамытуға дайын екендіктерін білдірді.
«Қазақстан темір жолы» ҰК» АҚ тұрақты өсуді, халықаралық көлік жүйесіне кірігуді және Еуразияның негізгі транзиттік торабы ретіндегі Қазақстанның ұстанымын нығайтуды қамтамасыз ететін ауқымды инвестициялық бағдарламаны белсенді түрде іске асыруды жалғастыруда.
