Достық-Мойынты учаскесінде жаңа энергия объектілері пайдалануға берілді
«Достық – Мойынты теміржол учаскесінің екінші жолдарының құрылысы» жобасын іске асыру шеңберінде энергетикалық инфрақұрылымның жаңа объектілерін пайдалануға беру бойынша жұмыстар аяқталды, деп хабарлайды Rail-news.kz.
«Достық» және «Ақши» қосалқы станциялары арасында жалпы ұзындығы 109 шақырым болатын кернеуі 110 кВ әуе электр беру желісі пайдалануға берілді. Сондай-ақ, «Достық» қосалқы станциясының қуатын 16 000 кВ дейін ұлғайта отырып, қайта жаңарту жүргізілді.
Салынған энергия объектілері стратегиялық маңызды тораптарды — темір жол инфрақұрылымын, тіршілікті қамтамасыз ету жүйелерін, мемлекеттік шекара учаскелерін және қайта тиеу пункттерін сенімді және үздіксіз электрмен жабдықтауды қамтамасыз етеді. Бұдан басқа, Достық станциясының және оған іргелес аумақтардың 2000 жуық абоненті тұрақты электрмен қамтамасыз етілетін болады.
Жобаны іске асыру көлік инфрақұрылымын дамытуға және негізгі халықаралық бағыттардың бірінде теміржол тасымалының тиімділігін арттыруға ықпал етеді.