«Заң және Тәртіп» фотокөрмесі: Астанада көлік полициясының қызметі таныстырылды
Көліктегі полиция департаменті «Нұрлы Жол» теміржол вокзалының күту залында «Заң және Тәртіп» тақырыбында фотокөрме ұйымдастырды, деп хабарлайды Rail-news.kz.
Іс-шараның негізгі мақсаты – азаматтардың құқықтық санасын нығайту және оларды құқықтық тәртіпті қамтамасыз етуге белсенді қатысуға ынталандыру. Сонымен қатар, көлік полицейлерінің күн сайынғы қоғамдық тәртіп пен азаматтардың қауіпсіздігін қамтамасыз етудегі қажырлы еңбектерін айшықты фотосуреттер арқылы жұртшылыққа насихаттау.
«Заң мен Тәртіп» тұжырымдамасы қоғам тұрақтылығы мен қауіпсіздігінің негізі болып табылады. Бұл, әсіресе еліміздің теміржол және әуе көлігі нысандарында ерекше маңызға ие. Себебі, мұнда құқықтық тәртіптің сақталуы мыңдаған адамның қауіпсіздігімен тікелей байланысты», – деді Көліктегі ПД бастығының орынбасары Оңдасын Аштаев.
Оның айтуынша, бүгінгі күні Департамент пен оның аумақтық бөліністерінде екі жарым мыңнан астам полицей қызмет атқарады. Олар құқық бұзушылықтардың алдын алып, заңның үстемдігін қамтамасыз етіп жүр.
Ақпараттық саясат басқармасының басшысы Ләззат Қасымжанова көрмеде көлік полициясының қоғамдық тәртіпті қорғаудан бастап, жанештілік танытқан ерлік әрекеттеріне дейінгі аралықты сипаттайтын 50-ге жуық фотосурет қойылғанын атап өтті.
«Темірдей тәртіп пен табандылықты, тіпті, ең шешуші сәттерде басын бәйгеге тігуге дайын болуды талап ететін қызмет қашанда құрмет тудырады. Ал, ішкі істер органдары қызметкерлерінің ашықтығы, заңдылықтарды сақтауы, адалдығы мен отансүйгіштігі халықтың сенімін арттырады», – деді ол.
Расында, көрмедегі суреттерде тәртіп сақшыларының күнделікті қызметі туралы шынайы кадрлар, яғни, теміржол вокзалдар мен жолаушылар поездарын патрульдеу, қылмыстың алдын алу және азаматтармен өзара ықпалдастық сәттері көрініс тапқан. Бұған қоса, іс-шара барысында полицейлер жолаушыларға аса қауіпті аймақтарда жүріс-тұрыс ережелері жазылған буклеттер мен жадынамалар таратып, ақпараттық-түсіндіру жұмыстарын жүргізді.
«Заң және Тәртіп» фотокөрмесі – қоғамдық тәртіпті қорғау сапында жүрген азаматтарға деген құрметтің белгісі іспетті. Сондай-ақ, аталмыш көрме полиция қызметкерлерінің қоғам мен мемлекет мүдделерін құқыққа қарсы қолсұғушылықтардан қорғау жолындағы маңызды миссиясын еске салды.