Темір жолға тартылған қаражат неге керек – сарапшы түсіндірмесі
ҚТЖ-ның Инновациялық орталығында темір жолы саласын одан әрі дамытуға арналған кездесу өтті. Кездесу барысында сала сарапшысы – Инвесторлармен жұмыс департаментінің директоры Данияр Арқалық теміржол саласына тартылған қаражаттың мақсаттары туралы толығырақ айтып берді, деп хабарлайды Rail-news.kz.
Көлік-логистикалық әлеуетті дамыту жөніндегі мемлекеттік саясатты іске асыру шеңберінде компания теміржол желісін дамытуға, өткізу қабілетін арттыруға және елдің транзиттік әлеуетін нығайтуға бағытталған инфрақұрылымдық жобаларды қамтитын ауқымды бағдарламаны кезең-кезеңімен іске қосуды жүзеге асырады. Жобаларды қаржыландыру халықаралық тәжірибеде қолданылатын түрлі көздерді қамтитын теңдестірілген тәсілді пайдалана отырып орындалады. Тартылатын қаражат жаңа теміржол желілерін салуға, қолданыстағы инфрақұрылымды жаңғыртуға және халықаралық көлік дәліздерінің өткізу қабілетін арттыруға бағытталады.
Fitch және Moody's халықаралық рейтингтік агенттіктері ҚТЖ-ның кредиттік рейтингінің инвестициялық деңгейін растап отыр. Жүк тасымалы тұрақты қарқынды көрсете отырып, негізгі табыс көзі болып қала береді. Компания сонымен қатар S&P Global бағалауында ESG көрсеткіштері бойынша әлемнің жетекші көлік компаниялары қатарына кіреді, бұл бизнестің тиімділігі мен тұрақтылығын арттыруда жүйелі жұмысты көрсетеді.
Жобаларды іске асыру көлік инфрақұрылымын одан әрі дамытуды, тасымалдау процесінің тиімділігін арттыруды және Қазақстанның еуразиялық кеңістіктегі негізгі транзиттік буын ретіндегі рөлін күшейтуді қамтамасыз етеді.