Теміржолды кесіп өткен 18 мыңнан астам адам жауапқа тартылды
Көліктегі полиция департаменті теміржол инфрақұрылымы нысандарында жазатайым оқиғалардың алдын алу бойынша жүйелі жұмысты жалғастыруда. Профилактика аясында көлік полицейлері теміржол ұйымдарында, білім беру мекемелерінде және халықпен кездесулерде тұрақты түрде түсіндіру жұмыстарын жүргізіп, аса қауіпті аймақта өзін-өзі ұстау ережелерін сақтаудың маңыздылығын түсіндіруде, деп хабарлайды Rail-news.kz.
Әкімшілік полиция басқармасының мәліметінше, жыл басынан бері белгіленбеген жерлерден теміржолды кесіп өткені үшін 18 мыңнан астам азамат жауапкершілікке тартылды. Қабылданып жатқан шараларға қарамастан, теміржолда жарақат алу жағдайлары әлі де тіркелуде. Өткен кезең ішінде Департаментте теміржол көлігімен байланысты азаматтардың жарақаттануының 17 дерегі тіркелді, оның 12-сі өліммен аяқталды.
«Бұл қайғылы статистика кәмелетке толмағандарды да, ересектерді де ойландыруы тиіс. Денсаулық пен кей жағдайда өмірдің өзі тек олардың қырағылығы мен қауіпсіздік ережелерін қатаң сақтауына байланысты», – деді Көліктегі ПД бастығының орынбасары Құрмет Мәжікенов.
Оның айтуынша, пойыз қағып кету оқиғаларының саны бойынша ең күрделі жағдай Алматы, Қызылорда және Өскемен станцияларында байқалады. Оқиғаларды талдау көрсеткендей, қайғылы жағдайлардың негізгі себептері – теміржолды белгіленбеген жерлерден кесіп өту, сондай-ақ азаматтардың мас күйінде қауіпті аймақта болуы.
Тек соңғы тәуліктің өзінде Қарағанды-Сұрыптау және Қызылорда станцияларында осындай құқық бұзушылықтар тіркелді. Барлық жағдайда азаматтар теміржолды рұқсат етілмеген жерлерден кесіп өткен. Пойыз машинистерінің жедел әрекеттерінің арқасында құрам дер кезінде тоқтатылып, қайғылы жағдайлардың алдын алу мүмкін болды.
«Көлік сақшылары азаматтарды теміржолдағы қауіпсіздік ережелерін қатаң сақтауға шақырады. Ата-аналар теміржол маңында балаларды қараусыз қалдыруға болмайтынын есте сақтауы тиіс. Жазғы демалыс қарсаңында балаларды бақылауға алып, оларға теміржол нысандарының маңындағы қауіпсіздік ережелерін түсіндіруге ерекше көңіл бөлген жөн», – деп түйіндеді сөзін Қ. Мәжікенов.