Қытайдан Достық арқылы өтетін контейнерлік пойыздар саны 26,6%-ға артты
Собственный корреспондент по Алматинской области
2026 жылдың бес айында Достық станциясы барлық жоспарлы көрсеткіштерді орындап, жүк тасымалын тұрақты қамтамасыз етті деп хабарлайды Rail-news.kz.
Осы кезеңде Қазақстан мен Қытай арасындағы жүк тасымалының көлемі 8,78 млн тоннаны құрап, өткен жылдың сәйкес кезеңімен салыстырғанда 14,6%-ға өсті. Оның ішінде Қазақстаннан Қытайға экспорт көлемі 6,45 млн тонна болса, Қытайдан импорт 2,33 млн тоннаға жетті.
Биылғы негізгі көрсеткіштердің бірі – контейнерлік пойыздар санының айтарлықтай артуы. Қытайдан тар табанды жол арқылы 2 054 контейнерлік пойыз қабылданып, бұл өткен жылмен салыстырғанда 432 пойызға немесе 26,6%-ға көп болды. Олардың 1 086-сы Еуропаға, 778-і Ресейге, 50-і Беларуське және 140-ы Қазақстанға бағытталды.
Ал Қытайға кең табанды жолмен 1 435 контейнерлік пойыз жөнелтілді. Бұл өткен жылмен салыстырғанда 9,8%-ға артық.
Станцияның қайта тиеу алаңдарында бес ай ішінде 63 642 вагон, 115 900 контейнер өңделіп, 1,85 млн тонна жүк тасымалданды. Контейнерлер саны бір жылда 20%-ға өсті.
Қазіргі уақытта Достық станциясында бес ірі қайта тиеу кешені жұмыс істейді. Мамандардың үйлесімді еңбегінің арқасында станция халықаралық көлік дәлізінің үздіксіз жұмысын қамтамасыз етіп, еліміздің маңызды көлік-логистикалық торабы ретіндегі мәртебесін нығайтып отыр.