ҚТЖ мен Wabtec стратегиялық серіктестікті кеңейтуді талқылады
«Қазақстан темір жолы» ҰК» АҚ Басқарма төрағасы Талғат Алдыбергенов Wabtec компаниясының атқарушы вице-президенті және қаржы директоры Джон Олинмен кездесу өткізді. Кездесу Мемлекет басшысының қатысуымен өтетін Шетелдік инвесторлар кеңесінің алдағы отырысы аясында ұйымдастырылды деп хабарлайды Rail-news.kz.
Тараптар локомотив паркін жаңғырту, сервистік инфрақұрылымды дамыту, өндірісті жергіліктендіру және теміржол көлігінде цифрлық технологияларды енгізу салаларындағы одан әрі ынтымақтастықтың негізгі бағыттарын талқылады.
Талғат Алдыбергенов Wabtec компаниясы ҚТЖ-ның стратегиялық серіктесі екенін атап өтті. Көпжылдық ынтымақтастық локомотив паркінің сенімділігін арттыруға және тасымалдау процесінің тиімділігін күшейтуге ықпал етіп келеді. ҚТЖ локомотивтердің бүкіл өмірлік циклі бойынша, яғни жеткізу мен сервистік қызмет көрсетуден бастап инновациялық шешімдерді, предиктивті диагностика технологияларын енгізуге және мамандар даярлауға дейінгі бағыттарда өзара іс-қимылды кеңейтуге мүдделі екені айтылды.
Кездесуге қатысушылар Қазақстанда компоненттер өндірісін жергіліктендіру, заманауи сервистік қуаттарды дамыту және локомотивтердің техникалық жай-күйін мониторингтеудің цифрлық құралдарын қолдану мәселелеріне ерекше назар аударды.
Келіссөздер қорытындысы бойынша тараптар теміржол тасымалдарының тиімділігін арттыруға, Қазақстанның транзиттік әлеуетін дамытуға, сондай-ақ бірлескен инвестициялық және технологиялық жобаларды іске асыруға бағытталған стратегиялық әріптестікті одан әрі нығайтуға дайын екендерін растады.