Формализмнен арылатын уақыт жетті...

Жаңалықтар

24.12.2017, 16:44

Қазіргі таңда Семей ЖТ бөлімшесінің Семей локомотив пайдалану депосы өндірістегі үнемділік бойынша тың табыстарға қол жеткізіп отыр. Жетістіктер қатарына локомотив бригадаларын ұйымдастырудағы тиімділік, кадр саясаты бірінші кезекте себеп болуда. Осы орайда локомотившілер ұжымындағы қызметті ұйымдастыру барысындағы жаңашыл шаралар туралы ұзақ жылдардан бергі депо директоры, «Құрметті теміржолшы» Дәулет Ыдырысовты әңгімеге тартқан едік. – Дәулет Тайтөлеуұлы, «бәрін де кадр шешеді» деген нақыл күні бүгінге дейін маңызын жоймаған секілді. Деподағы мамандар біліктілігін арттыру бағытындағы шаралар қатарына тоқтала кетсеңіз. – Иә, бұл тарапта бұрынғы жылдарға қарағанда бірқатар өзгерістер орын алуда. Әуелгі кезектегі жаңашылдықтар қатарына тоқталсақ, техникалық дәріс өткізуге өзгерістер енгізілді. Инструкция барысы толығымен тексеруден өтеді. Қауіпсіздікке байланысты орын алған кез келген ақаулық қатаң тексеріліп, талқыға түседі. Бұл шаралардың басы-қасында мекеме басшысы ретінде өзім жүремін. Кейбір кездерде барлық келеңсіздік тех. дәрістердегі жіберілген кемшіліктерге алып баратыны бар. Сол себептен, мұндай сабақтарға арнайы қатысып, ойдағыдай жүргізілуін қадағалаймын. Жалпы, бүгінде формализмнен арылатын уақыт келді. Сол себепті, депода өтетін барлық жиындарды локомотившілердің өзіндік «тілінде» жүргізіп, барша қызметкерлер болып жұмыс жасау қажет деп санаймын. –Қызмет барысындағы кемшіліктердің алдын алып, ақаулықтарға жол бермеу мәселесіне қатысты не айтасыз? –Бұрындары орын алған ақаулықтарға байланысты көп жағдайда орындаушы тарап – машинистер мен машинист көмекшілері жазаланса, қазіргі күні бұл тәсіл өзгерді. Барлық сапасыз орындалған міндеттемелерге басшылық тарап бірінші кезекте жауапты. Соның аясында деподағы инструкторлық құрам жіберген кемшіліктер толық тексеріліп, депо кезекшілеріне дейін сұрау салынады. Арнайы хаттама толтырылып, тың міндеттер белгіленеді. Сараптама көрсеткендей, бұл әдіс қозғалыс және еңбек қауіпсіздіктерін сақтауда оң нәтижесін беруде. Локомотив шаруашылығы бейқамдықты көтермейді. Әрдайым бабыңда болып, қалтқысыз қызмет ету міндет. Жұмыс барысында мүлт кету - үлкен шығын әкелуі мүмкін. Міне, осы орайда локомотив бригадаларының кәсібилігін шыңдау бағытында жұмыстар жүргізіледі. Бұл шаралар инженерлік-техникалық қызметкерлер үшін де маңызды саналады. Басты мақсат – қозғалыс қауіпсіздігін сақтау, машинистер өмірі мен денсаулығын қамтамасыз ету. Бұл орайда арнайы әзірленген жоспар аясында желі бойындағы қауіпсіздік жұмыстарын сақтауда локомотив бригадалары бойынша арнайы инструктаждар өткізілді. Қазіргі күні әр айдағы жұмыстар қорытындыланып, сарапталатын болды. Түйіндей келе, локомотившілер әрдайым сергек болуы тиіс. – Биылғы нәтиже көңіліңізден шыға ма? – Көрсеткіштерге тоқталар болсақ, биылғы жылды жемісті қорытындылаймыз деген сенім басым. Осы мерзімге дейінгі межеленген міндеттемелердің барлығын да толығымен орындадық. Жолдың баллдық деңгейінің жақсаруы ұзын жылжымалы құрамдардан тұратын ауыр салмақты пойыздарды сапарға шығаруға мүмкіндік беріп отыр. Ал бұл жайт өз кезегінде экономикалық көрсеткіштерді де еселейтіні белгілі. Ең маңыздысы – сапалы жұмыс. Жолаушылар мен сеніп тапсырылған жүктерді діттеген жерге мерзімінде әрі қауіпсіздікті сақтай отырып жеткізу зор жауапкершілікті жүктейді. Біздің басты мұратымыз да – осы. – Еңбектеріңіз жемісті болсын!

Формализмнен арылатын уақыт жетті...

Басқа да жаңалықтар

Қазақстан теміржолшысы газеті, №16 03 наурыз 2026 жыл