Отын-энергетикалық ресурстағы оң өзгеріс

Жаңалықтар

30.01.2018, 12:21

Пойыздар тартымына бірінші кезекте ықпал ететін жайт – отын-энергетикалық ресурс екені белгілі. Бұл тарапта Семей ЖТ бөлімшесі бойынша өткен жылғы жанармай қолданысына жүргізілген сараптама қорытындысына сүйенсек, біршама елеулі жаңалықтар бар екен. Ерекше тоқталатын жайт, өткен жыл бойынша дизельдік шығынның салыстырмалы нормасы 26,75 кг/10 мың.т.шқ. брутто болса, орындалуы 27,52 кг/10 мың. т.шқ. бруттоны құраған. Бұл дегеніміз, қомақты қаржы саналатын 1332 тонна жанармай артық жұмсалды деген сөз. Мамандар сөзіне сүйенсек, отын шығынының асып кетуіне бірқатар позитивті факторлар себеп болған. Оның ең бастысы – бруттодағы жүк айналымының 101,7%-ға өсуі болып отыр. Сонымен қатар, қосымша факторлар да айтарлықтай ықпал еткен. Мәселен, қозғалыстың шаруашылық түрі біршама ұлғайған. Яғни, локомотивтер жол техникасымен жұмыс істеуге тартылып, шығыс 790,6 тоннаға өсіпті. Сондай-ақ, жолаушылар қозғалысының артуы да жанармай қолданысына елеулі түрде әсер еткен. Бұл ретте, күнделікті айналымға қосымша жолаушылар пойыздары - №67/68, №69/70 пойыздар қосылып, жанармай шығынының көлемі 397,6 тоннаға көбейгені анықталып отыр. Жалпы, мұндай оң сипаттағы мысалдарға көптеп тоқталуға болады. Атап айтсақ, бөлімше бойынша жүк айналымының артуына байланысты 1,2-ші класты тораптық станциялардағы маневрлік локомотивтер саны да артқан. Осы ретте 209,5 тоннаның жанармайы артық қолданылыпты. Тоқтала кетер тағы бір жайт, отын-энергетикалық ресурс бойынша бұл көрсеткіштерден басы артық шығындарға орын берілген жоқ. Сол тәрізді қол сұғу мәселесі де тіркелмеген. Қауіпсіздік шаралары мақсатында барлық тепловоздар дерлік энергетикалық отын тартымын автоматтандырылған басқару жүйесі сынды жаңашыл аспаппен жабдықталған. Локомотивтердегі энергодиспечерлік тартымды анықтайтын АСУ ЭДТ құралдары да жанармай жұмсаудың есебіне адамның рұқсатсыз кірісуіне жол бермейтін бірегей мүмкіндік. Өткен 2017 жылдың жалпы көрсеткіші бойынша отын-энергетикалық ресурстың жұмсалуына жүргізілген сараптама жұмыстары осы тәрізді бірқатар жайттарды анықтап, қосымша фактілерді нақтылап берді. «Шығынсыз кіріс жоқ» деген халық нақылын берік тұтқан семейлік теміржолшылар бұл көрсеткіштерден тек оң нәтижелер ғана анықталғанына қуанышты. Атап өтерлігі сол, жұмсалатын шығындар бойынша мұндай ерекшелік соңғы жылдары орын алмаған болатын.

Отын-энергетикалық ресурстағы оң өзгеріс

Басқа да жаңалықтар

Қазақстан теміржолшысы газеті, №32-33 28 сәуір 2026 жыл