Пойыз диспетчері – торап командирі

Жаңалықтар

06.03.2018, 15:26

Теміржол көлігі колледжін бітірген жас қыз еңбек жолын Шайқұрық станциясында станция кезекшісі болып бастапты. Міне, соңғы он жыл – Жамбыл станциясында жауапты да күрделі қызметте, пойыз диспетчері. Басшылық Жұпар Құлсариеваны жігерлігімен қатар жауапкершілігі жоғары, өз ісіне тыңғылықты маман ретінде жоғары бағалайды. Әйтпесе, ең қиын да күрделі Шу торабына жауапты диспетчер болып тағайындалуы екіталай еді. Себебі, бұл жігіттің жігітіне сын жауапты жұмыс. «Әр жұмыстың өз қиындығы бар. Біз өз жұмысымызды жетілдіруге тырысамыз. Бөлімше басшылығымен тікелей байланыста боламыз, қандай да бір төтенше жағдай орын алса, шұғыл хабарлап, ақыл-кеңес аламыз, келісеміз. Біздің жұмыста жұмысты ертеңге қалдыру, ертең істей саламын деген ұғым жоқ. Әскери тәртіп, нақтылық, бәрі түсінікті және уақытылы болуы керек. Мен Шу торабына басшылық жасаймын. Шу станциясы – тәулік бойы құрамдар сеңдей сапырылып жатқан үлкен тораптық станция. Алматы–Шу телімінде екінші жолдардың салынуымен пойыздар ағыны арта түсті. Біздің қызметіміз – барлық пойыздардың қозғалысын реттеп, олардың қалтқысыз қызметін ұйымдастыру. Сол себепті маневр диспетчерімен, станция кезекшісімен, вагон операторымен қоян-қолтық жұмыс істейміз. Басты міндетіміз, пойыздар қозғалысының қауіпсіздігін қамтамасыз ету. Төтенше жағдайлар орын алса, шұыл шешім қабылдап, тез әрекетке көшу. Сол себепті біздің бөлім – шұғыл-басқару бөлімі деп аталады. Келешекте жүк пойыздары да жолаушылар пойыздары сияқты қозғалыс кестесіне көшеді деп жоспарлануда. Бұл ой іске асып жатса, жұмысымыз сәл де болса жеңілдеп, жүйелі болары анық. Бірақ, жауапкершілік одан азаймайды. Жалпы жұмысым өзіме ұнайды. Өзіңнің маңызды істі атқарып жүргеніңді мақтан тұтасың» деген пойыз диспетчері Жұпардың салмақты да салқынқанды жан екені бірден байқалды. Көп сөзден гөрі көп іс тындырғанды ұнататын Жұпардың үйдегі қуанышы жеті жасар қызы екен. Жауапкершілікті бәрінен жоғары қоятын Жұпар Жаңа жылды да, Әйелдер мерекесін де жұмыста қарсы алған кездері болыпты. Онысына бәлсінбейді де, өйткені, жұмыстың аты – жұмыс. Ол үшін бұл – кезекті жұмыс күні.

Пойыз диспетчері – торап командирі

Басқа да жаңалықтар

Қазақстан теміржолшысы газеті, №65 18 тамыз 2026 жыл