Сырдан төнген қауіп жоқ

Жаңалықтар

20.03.2018, 17:01

Оқуға 2 мин

Сыр бойының теміржолшылары көктемгі жауын-шашын кезінде пойыздар қозғалысының қауіпсіздігін сақтауға дайындықтарын бір сәтке де босаңсытқан емес. Әрине, күн жылып, қар кетсе де қауіптің беті мүлде қайтты деуге әлі ертерек. Сондықтан Қызылорда ЖТ бөлімшесі бойынша су тасқынына қарсы жасақталған 15 вагондық пойыз құрамы Сексеуіл, Қазалы және Қызылорда жол дистанцияларында жасақталып дайын тұрғанына бірталай уақыт өтті. Бұл дайындық компания басшылығының жылжымалы құрамдардың кідіріссіз және қауіпсіз қозғалысын сақтау, жолдарды дер уақытында дайындау, жол бойындағы жасанды құрылыстар мен су өткізгіш құбырлардан көктемде еріген қар суының кідіріссіз өткізу жайлы ағымдағы жылдың 19 ақпанында жариялаған №25 Ц бұйрығы негізінде әзірленген. Сонымен қатар сала басшыларынан құрылған комиссия жасақталып, шұғыл іс-шаралар жүйесі түзіліп, жол бойы мен арагідік дария жағалауын кезекшілікке алып, бақылау жұмысы басталған. Қазіргі таңда бұл жұмыстар тұрақты жүргізіліп келеді. – Қазір Сырдариядан төнген қауіп жоқ. Дегенмен, көктемгі жауын-шашынның көбеюі шүғыл жұмыстар тізбесін жасап, барлық телімдерді бақылауға алып, кезекшілікті күшейтуге мәжбүрлейді. Бөлімшедегі Сексеуіл, Қазалы және Қызылорда жол дистанция басшылары мен комиссия мүшелері тарапынан телімдер үздіксіз тексеруден өткізілуде. Жол дистанциялары жолшылары арық, құбыр, жыраларды тазалалап, су өту жолдарын ашып қойған. 15 вагондық құрамның бесеуі Қызылорда станциясында тұр. Осындай вагон құрамы Қазалы және Сексеуіл станцияларында да жасақталған, – дейді көктемгі жауын-шашынды тосын жағдайсыз өткізуге дайындық шаралары жайлы Магистральдық желі бөлімшесінің бас инженері Берік Бекжанов. Бөлімше бойынша 164 көпір, 230 құбыр, 8 жыра, 4 арық пен 5 ор бар екені мәлім. Жол дистанцияларының көпір бригадалары кезекшілікпен жасанды құрылыстар мен жол бойын бақылауда ұстап отыр. Сырдария өзеніндегі су деңгейі жайлы күнделікті мәлімет алынып, соған орай бақылау да күшейтілуде.

Сырдан төнген қауіп жоқ

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл