Салт-дәстүрді жаңғыртып...

Жаңалықтар

20.03.2018, 17:11

Оқуға 2 мин

Бүгінде ақ кимешекті әжелерді көбінесе тек Наурыз мерекесінде ғана көретініміз рас. Әйтсе де, Семейде этножәдігер саналатын осынау киім үлгісін жайшылық уақытта да, қоғамдық шараларда да киіп жүретін бір шоғыр байырғы теміржолшы әжелер қауымы бар. Семей ЖТ бөлімшесі ардагерлерінен құралған, әйелдердің «Бағыт» қоғамдық бірлестігінің мүшелері – осы салт-дәстүрді сақтаған, сары қымыз баптаған әжелер. Әйгілі Мойынбаевтар дистанциясының өкілі, ұзақ жылдар бойы Семей теміржол вокзалының бастығы болған Нағима Абдуайтқызы зейнеткерлікке шыққасын жұмысын жаңа бағытта жандандырды. 2007 жылы «Бағыт» қоғамдық бірлестігін құрып, қаладағы өздері секілді түрлі ұйымдармен бірлесіп, тағылымды шаралар жүргізуді қолға алды. Мәселен, қалалық Достық үйінде орын тепкен «Ахау Семей!» қазақ ұлтының құндылықтарын қолдау орталығымен қанаттасып, түрлі танымдық іс-шаралар өткізуде. Соның ішінде, әсіресе, жас буын арасында ұмытылып бара жатқан салт-дәстүрлерді насихаттау, қазақстандық патриотизмді қалыптастыру бойынша ілкімді жұмыс жасауда. Атап айтсақ, аталмыш бірлестік мүшелерінің қатысуымен қала бойынша «Қымызмұрындық», «Ақ орамал», «Бауырсақ» сынды этномәдени тұрғыдағы, қызғылықты әрі танымдық мазмұны бай шаралар өткізіліп жүр. Теміржолшы әжелер сапында байырғы теміржол саласының ардагері Бижамал Қалиқызын, Семей станциясында бұрма бағыттамашысы болған Тұрсынғайша Багенованы, вагон шаруашылығының бүгінгі ардагері Күләш Құдайбердіқызын, т.б. көруге болады. – Теміржолшы ардагерлер арасында дәстүрлі «әжелер мектебін» құрудағы басты мақсатымыз – жастар арасында ұлттық салт-сананы жаңғырта отырып, салт-жоралғыларды дәріптеу, ұлтты сүюге баулу, қала берді отбасы құндылықтарын сақтауға, әулет шежіресін білу, ене мен келін қарым-қатынасы, ұрпақ тәрбиесі сынды ізгі қасиеттерді нығайту, – дейді ұйым жетекшісі Нағима Мойынбаева. Адагерлердің еш ақысыз орындалатын қоғамдық қызметі, әсіресе, Наурыз мерекесі, 1 мамыр – Қазақстан халықтарының бірлігі күні мен теміржолшылардың кәсіби мерекесінде қыза түседі. Сонымен қатар, мамыр айы туысымен орталық саябақта қайырымдылық, танымдық негізде «Қымызмұрындық» сынды іс-шаралар ұйымдастырып, өскелең буынға ұлттық сусынның қадір-қасиетін, бабалар тағылымын үйретеді. Қала берді қалалық Достық үйіндегі үйірмеде тегін түрде қыз-келіншектерге ою-өрнек әзірлеу, құрақ көрпе тігу, ұзатылар қыз жасауын даярлау сынды дәстүрлер түрін дәріптеуде. Міне, наурыз туды. Алда мерекелік шаралар қатары мол. Әжелер қауымы тұсау кесу, нәрестені бесікке бөлеу, табақ тарту сынды ұлттық салт-дәстүр түрлерін тағы бір мәрте халық жадында жаңғыртып, сахна төрінен дәріптемек. Қатарлары зейнеткерлікке аяқ басқан жаңа мүшелермен де толығуда.

Салт-дәстүрді жаңғыртып...

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл