Талапқа сай

Жаңалықтар

28.03.2018, 17:23

Өткен жылы өндірістік жұмыс кезінде еңбек қауіпсіздігінің бұзылуына жол бермеген Сексеуіл станциясының теміржолшылары ағымдағы жылдың алғашқы екі айын да тосын жағдайсыз өткізді. Өндірістік қауіпсіздік шараларын арттырып, еңбеккердің еңбегін қорғауды мақсат тұтқан станция басшылығы биыл да осы жұмыстардың сапасын арттыруға көңіл бөліп, нәтижелі жұмыстарды жалғастырып келеді. – Станцияда ауысымдық жұмыс алдында дәрігерлік тексеруден өткізілетін теміржолшылардың денсауылығында кінәрат болған жағдайда олар дереу күтімге алынады. Жалпы ұжым бойынша 5 маневр диспетчері, 10 дспп, 10 пойыз құрастырушы ауысым алдындағы міндетті дәрігерлік тексеруден өткізіледі. Өткен жылы дәрігерлердің қатаң бақылауынан өткізіліп жұмысқа қосылып отырған теміржолшылар денсаулығына байланысты жұмыстан шеттетілмегенмен, бір жыл ішінде 111 адам түрлі жағдайда дәрігерлік ем-дом алды, – дейді Сексеуіл станциясы бастығының орынбасары Еркебұлан Аралбайұлы. Теміржолшылардың еңбек қауіпсіздігін қатаң бақылауда ұстайтын станция басшылығы қауіпсіздік күні мен еңбек қорғау күнін ай сайын өткізіп, еңбек жағдайын жақсарту арқылы еңбек шарттарын жетілдіре отырып, жұмысшы еңбегінің қорғалуын бірінші кезекке қояды. Қауіпсіздік және еңбек қорғау күні станция басшылығы теміржолшылардың, оның ішінде арнайы маневр диспетчерлерінің жұмыс орындарында еңбек қорғаудың 1-дәрежелі бақылауы өткізілсе, 2-дәрежелі бақылау станция басшысы тарапынан әр он күн сайын өткізіліп тұрады. Сонымен қатар, станция жолдарында жұмыс жасайтын теміржолшыларды өндірістік жарақат алудан сақтандыру үшін, олардың еңбек қорғау талаптарын орындауын қадағалау үшін және пойыздар қозғалысының қауіпсіздігін сақтау қағидалары бұлжытпай орындалуы үшін дауыс зорайтқыш арқылы тұрақты хабарлама оқылып тұрады. Теміржолшылардың жұмыс орындарын техникалық талапқа сай санитарлық-тұрмыстық деңгейде ұстап тұру үшін әр аптада тазалық күні өткізіледі. Ай сайын станция жолдарындағы ескерту белгілері мен аншлагтар да тексеруден өткізіліп, ескіргендер жаңаланады. Техникалық процестердің сақталуын назарда ұстау үшін қауіпсіздіктің жоғары аумағында, белдеулерінде тосын тексерулер ұйымдастырылады. Мәселен, өткен жылы 54 мәрте тосын тексеру, 26 рет түнгі бақылау өткізілген екен. Тексерулер кезінде анықталған кемшіліктерді дер кезінде орындауға күш салынып, түсіндіру жұмыстары мен инструктаждар жүргізілген. – Өткен жылы станция басшылығы және арнайы мамандар тарапынан теміржолшылармен 26 техникалық пысықтау сабағы ұйымдастырылып және бірнеше мәрте бекітілген тақырыптар мен телеграфтық тапсырмалар негізінде еңбеккерлердің техникалық біліктілігін арттыру жұмыстары атқарылды, – дейді станция бастығының орынбасары.

Талапқа сай

Басқа да жаңалықтар

Қазақстан теміржолшысы газеті, №65 18 тамыз 2026 жыл