"Қауіпсіздік күні" көптік етпейді

Жаңалықтар

10.04.2018, 12:09

Оқуға 2 мин

Белкөл – Қызылорда өңірінде орналасқан жүк станциясы. Станция басшылығы тарапынан еңбеккерлердің жұмыс орнында қауіпсіздік талаптарын орындауын бақылау мақсатында ай сайын 4 мәрте «қауіпсіздік күні» өткізіледі екен. Станцияда жұмыс істейтін теміржолшылардың денін жастар құрайды. Сондықтан станция бастығы Мақсат Жүсіпов қауіпсіздік күні ешқашан да көптік етпейтінін айтады. Облыс көлемінде өндірілетін мұнай-газ өнімдері тасымалының құбырға көшірілуі станциядағы қарбалас тіршілікті біршама бәсеңдеткенмен, жүк станциясының жұмысын бір сәтке болсын бәсеңсіткен емес. Белкөл станциясына келгенімізде станция бастығы Мақсат Жүсіповті теміржолшылармен күнделікті ауысым алдындағы инструктажын өткізіп, кейбіріне жекелей тапсырма беріп жатқан кезінде жолықтырдық. – Өткен жылы және ағымдағы жылдың алғашқы екі айында пойыздық және маневрлік жұмыстарда кемшілік орын алған жоқ. Станция еңбеккерлері жылжымалы құрамдардың қауіпсіз қозғалысын толық қамтамасыз етіп келеді. Жұмыс барысында кемшілік жібергендер болса, сәйкесінше акт толтырылып, кемшіліктің орын алуына байланысты шара қолданылып, жазба толтырылып, қайталанбауы үшін инструктаждар, қажет болған жағдайда техникалық сабақтар өткізіледі, нәтижесі жоғары, – дейді станция бастығы. Өткен жылдың алғашқы тоқсанында 810 вагоннан 33284 тонна жүк түсірген белкөлдік теміржолшылар биылғы үш ай ішінде 700 вагоннан 30195 тонна жүк түсіріпті. – Біздің ұжым мүшелерінің ешқайсысы кездейсоқ келген жан емес, бәрі де осы станцияда туып-өскен теміржолшылар отбасынан шыққан жандар, көзін ашқалы көргені теміржол болған соң, бәрі де өз ісінің шебері деп айтуға болады. Бәрі өз ісін жоғары жауапкершілікпен атқарып, құжат айналымы, станциялық жұмыс құжаттарының қағазға түсірілуі секілді жұмыстарды талапқа сай орындап отырғанының арқасында ұжымымыз бөлімше бойынша үздіктер қатарынан көрініп отыр. Бұл біздер үшін үлкен жетістік деп санаймыз. Әрине, бұл жетістікте аға тауар кассирі Алма Боранбаева, станция кезекшісі Гүлмира Жүнісова, пойыз құрастырушы Бағдат Жаханов және осы станция жұмысын үйлестіруші ретіндегі тәжірибелі теміржолшы, станция бастығының орынбасары Ғалымжан Әбдірамановтардың үлесі өзгелерге қарағанда қомақты деп айта аламын, – дейді үлгілі ұжымның басшысы Мақсат Өмірбекұлы. Өткен наурыз айында 319 вагонға 14088 тонна жүк тиеп, 644 вагоннан жүк түсірген белкөлдіктер тәулігіне шамамен 23 вагонды жүгінен арылтып отырған екен.

"Қауіпсіздік күні" көптік етпейді

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл