Ұстазы жақсы қандай-ды...

Жаңалықтар

25.05.2018, 13:16

Қай салада да жасағанын жария етпей-ақ кейінгі жас ұрпаққа өнегілі ісімен, байыпты байсалдылығымен үлгі болатын қарапайым еңбек адамдары болады. Ақтөбелік Сәмет Шүйіншалиев – сондай жан. Теміржолшылар отбасында дүниеге келген Сәмет Байкелұлы еңбек жолын 1972 жылы Шалқар локомотив депосында жүк көтергіш кранда жүк ілуші болып бастайды. Сол жерден әскер қатарына шақырылып, екі жыл азаматтық борышын өтеп келгеннен кейін Шалқар қалпына келтіру пойызына кран жүргізушісі болып жұмысқа орналасады. Мекеменің жолдамасымен Ресейдің Ростов на Дону қаласында тәжірибесін ұштап, мамандығын шыңдау үшін жүк көтеру крандарын дайындайтын техникалық мектепте кран машинисі мамандығын игереді. Содан 1978 жылдан бері ПЖ-45, ЕДК-500, ЕДК-1000 маркалы жүк көтергіш крандарында кран машинисі болып үздіксіз қызмет етті. Арасында біліктілігін арттыру мақсатында Ақтөбе темір жол техникумын техник-механик мамандығы бойынша тәмамдады. Техника қауіпсіздігін сақтай отырып, зіл темірдің тілін таба білген Сәмет Шүйіншалиев қоғамдық жұмыстарға да белсене араласты. Мекемеде кәсіподақ төрағасы болған ол 1989-1994 жылдар аралығында Ақтөбе облысы Шалқар қалалық кеңесінің депутаты болып сайланып, әріптестерінің мұң-мұқтажын шетуге барынша қолдау көрсетуге тырысты. Сәкеңнің шәкірттерінің бірі, кран машинисі Серік Исатай ұстазы туралы жылы лебізін білдірді. – «Ұстазы жақсының ұстанымы жақсы» демекші, пайғамбар жасына жеткен Сәмет Байкелұлының өнегелі еңбек жолын болашақ ұрпаққа үлгі етіп айтуға болады. Ол кісі бізді кәсіби мамандыққа баулып қана қоймай, тағдыр жолында тап келетін қиындықтармен күресуге де үйретті. Осындай жанның шәкірті болғанымды мақтан етемін, – дейді ағынан жарылған шәкірті. Шалқар қалпына келтіру пойызында табаны күректей 44 жыл еңбек еткен Сәмет Шүйіншалиев Темір жол қауіпсіздігі қоры басқармасының 2003 жылғы лауреаты атанып, «Қазақстан темір жолына – 110 жыл» медалімен марапатталыпты. Жуырда зейнеткерлікке шығып, ендігі жерде жұбайы Қуанышпен Алланың берген ұл-қызынан сүйген немерелерінің тәрбиесімен айналысуда. Бірақ әріптестері, әсіресе кеше өзі өсірген шәкірттері әлі де тыныш қоймай жиі жұмысқа шақырып, кеңес сұрап, «мазасын» алады екен. Ардагер ақсақал оған қуанбаса ренжіген емес.

Ұстазы жақсы қандай-ды...

Басқа да жаңалықтар

Қазақстан теміржолшысы газеті, №65 18 тамыз 2026 жыл