Елордаға саяхат

«Қазақстан темір жолы» ҰК» АҚ жыл сайын жазғы каникулда жас өскіндердің демалысын көңілді ұйымдастырып, дүниетанымын дамытуға мүмкіндік беретін түрлі шараларды қолға алып келеді. Соның тағы бір дәлелі, 22-24 шілде аралығында компанияның орталық кәсіподақ кеңесінің ұйымдастыруымен Шығыс пен Батыс Қазақстаннан 102 баланың Астанаға үш күндік саяхаты ұйымдастырылды. Бас шаһардың  20 жылдық мерейтойына  орайластырылған шарада Ақтөбе, Өскемен және Семей қаласынан келген балалар Астананың ең көрікті деген орындарын аралап, үш күн бойы орталық кәсіподақ қызметкерлерінің арнайы жасаған бағдарламасымен көңілді демалыстарын өткізді. Жас саяхатшылар қыдырысты алдымен ЭКСПО мұражайынан бастап, арнайы экскурсиялық автобуспен  «Бәйтерек» монументі, «Атамекен» этно-мемориальдық кешені, Бейбітшілік және келісім сарайы сынды көркі келісті ғимаратармен қоса, «Думан» океанариумы тектес бірнеше ойын-сауық орындарын тамашалады. – Компаниямызда еңбек ететін теміржолшылардың балаларына арналған мұндай экскурсия жыл сайын ұйымдастырылады. Былтыр ЭКСПО-2017 көрмесіне орай ұйымдастырсақ, биыл Астананың мерейтойына негіздедік. Шалғай өңірлерден келген балалардың елордаға саяхаттан мол әсер алуларына баса назар аудардық, – дейді орталық кәсіподақ төрағасы Оразғали Ахметбаев. Балалардың жолақысы компания мен ата-аналардың қалтасынан тең бөлінсе, ішер асы, жатар орны мен қаладағы серуен-саяхатты түгелдей кәсіподақ кеңесі мойнына алған екен. Бала-болашақ үшін осы тектес шаралар мұнымен шектелмейтін көрінеді. Мысалы, «ҚТЖ-Жүк тасымалы» АҚ қызметкерлерінің балалары Алматының тарихи орындарына экскурсияға бармақ. – Бүгінгі өскелең ұрпақтың бойында елжандылық, отансүйгіштік қасиеттерді дамытуға ерекше мән беруіміз керек. Сол себепті, біздің міндетіміз – қолда бар мүмкіндікті аямай соған алғышарт жасау. Ертең осы балаларымыз ел басқаратын азаматтар болар мүмкін. Сондықтан олардың рухани бай болуына дәл осындай елдік шаралардың тигізер пайдасы мол екеніне сенемін, – дейді Сала кәсіподағының басшысы.   Ардақ Зұлқажапқызы Суретті түсірген Александр Жабчук