Қазақстанда көліктің бірнеше түріне «бірыңғай» билетті енгізу мүмкіндігі талқыланды
«Қазақстан теміржолшысы» газетінің тілшісі
Қазақстандағы туризм саласын дамытуда теміржол саласының үлесі қандай? 24-25 маусымда елордадағы «ЕХРО» халықаралық көрме орталығында өткен Futuroad Expo Astana және Automechanika Astana көрмесі аясында қамтылған тақырыптардың бірі осы болды. Іс-шараның Интермодальды тасымал атты сессиясы кезінде қазақстандық теміржол саласының өкілдері ұйымдастырушылар тарапынан қойылған сұрақтарға жауап берді. Елімізде туризм саласын дамыту – маңызды мақсаттардың бірі. Осыған орай биыл «Қазақстан Республикасының кейбір заңнамалық актілеріне ту- ристік қызмет мәселелері бойынша өзгерістер мен толықтырулар енгізу туралы» Заң қабылданды. Оның ішінде туристік нарықты қолдау бойынша бірнеше шара қарастырылды, атап айтқанда, туристік көлікті сатып алған жағдайда оның 25 пайызын қайтарып беру мәселесі бар. Теміржолға қатысты туризмді дамыту ретіне келсек, интермодальды тасымалдау, яғни бір билетпен бірнеше көлік түріне міне отырып, діттеген жерге жету бойынша ұсыныстар мен бастамалар туралы сөз болды. Ішкі туризмге келсек, туристер әдетте ел ішінде әуе немесе темір жол көлігі арқылы саяхаттайды. Мәселен, Балқашқа дейін бір билет алып, сол билеттің ішіне Балқаш қаласына дейінгі әуе немесе темір жол көлігімен бару құны да, одан түскесін қалада сізді әрі қарай алып кететін автокөлік тасымалының ақысы да кіріп, сол жолдың бәріне бір билетпен барасыз. Модераторлар әуе және теміржол компанияларынан келген өкілдерден осы ұсынысты қаншалықты жүзеге асыруға болатынын сұрады. Осыған орай «Жолаушылар тасымалы» АҚ «Интермодальды жолсапар» жобасының атқарушы директоры Антон Саболевский аталған жобаның Қазақстан теміржолында былтырдан бастап қолға алынғанын айтты. Оны жүзеге асыру үшін бірнеше міндет жүктелген. – Біріншіден, тасымал бойынша жолаушыларға арналған жаңа модель керек, адам діттеген жеріне ұшақпен-ақ екі сағатта жетер болса, онда пойызда үш күн жүрудің қажеті бар ма, екіншіден, бірнеше көлік түрлеріне арналған қызметтерді бір жерден табатындай мобильді қосымша жасауды ұсындық, жалпы аталған жобаны Қазақстан теміржолы қолдайды, – дейді ол. Қатысушылар тарапынан қойылған сұрақтардың бірі жолаушылар пойыздарымен адамдардың жолда жүруі азайған қыркүйек-қазан айында туристік пойыздар ұйымдастыру мәселесіне қатысты болды. Жалпы бас- тама көтерушілер интермодальды тасымал туристер үшін логистиканы қысқартып қана қоймай, олардың қызметтің сан түрін көріп, түрлі әсер мен жағымды көңіл-күйге бөленуіне мүмкіндік береді деп санайды.