Бершүгір станциясында теміржолшыларға арналған спорт кешені ашылды
Ақтөбе облысының Бершүгір станциясында жол дистанциясы қызметкерлеріне арналған спорт кешенінің ғимаратына жөндеу жұмыстары аяқталды, деп хабарлайды Rail-news.kz.
Жұмыстарды жүргізу туралы шешім еңбек ұжымы мен кәсіподақ комитетінің бастамасы бойынша қабылданды. Станцияда 124 адам жұмыс істейді, бұған дейін шағын станцияда бос уақытты және спортпен шұғылдануды ұйымдастыруға арналған әлеуметтік нысандар болмаған.
Ауданы 488 м2 ғимарат заманауи спорттық жабдықтармен: жүгіру жолы, турниктер, күш жаттығуларына арналған жабдықтар, сонымен қатар үстел теннисі мен волейбол алаңдарымен жабдықталған.
Кешен базасында сауықтыру іс-шаралары мен спорттық сабақтар өткізілуде. Теміржолшылар балалары үшін шақырылған жаттықтырушының басшылығымен грек-рим күресінен секция ашылды.
Жаңартылған спорт нысанын пайдалануға беру Бершүгір станциясының әлеуметтік инфрақұрылымын дамытудағы маңызды кезең болды және жол дистанциясы қызметкерлері отбасыларының денсаулығын нығайту үшін қосымша жағдайлар жасады.
