New Silk Way: ҚТЖ еуразиялық транзитте стратегиялық көшбасшылықты күшейтуде
Алматыда Қазақстан көлік апталығы басты оқиғаларының бірі — «New Silk Way» VII халықаралық көліктік-логистикалық бизнес — форумының салтанатты ашылуы өтті. Форум Ақорданың тікелей эфирінде Қазақстан Республикасының Президенті Қасым-Жомарт Тоқаевтың құттықтау сөзімен басталды. Мемлекет басшысы Қазақстанның Шығыс пен Батыс арасындағы көпір ретіндегі ерекше рөлін тілге тиек ете отырып, жаһандық логистикалық байланыстарды одан әрі дамыту үшін халықаралық ынтымақтастықтың маңыздылығын атап өтті, деп хабарлайды Rail-news.kz.
Телекөпір барысында «Қазақстан темір жолы» ҰК» АҚ Басқарма төрағасы Талғат Алдыбергенов Мемлекет басшысына Транскаспий маршрутының өткізу қабілетін күшейтетін және Қазақстанның Еуразиядағы транзиттік рөлін нығайтатын маңызды инфрақұрылымдық бағыттардың бірі ретінде Достық – Мойынты учаскесінде екінші табан жолдарды салу жөніндегі ауқымды жобаны іске асыру туралы баяндады.
Форум аясында Талғат Алдыбергенов халықаралық көлік, инвестициялық және логистикалық ұйымдар өкілдерімен бірқатар стратегиялық кездесулер өткізді.
Форум 30 елден 500 астам қатысушыны — мемлекеттік құрылымдардың, халықаралық ұйымдардың және жеке сектор өкілдерін біріктірді. Күн тәртібінде — көлік дәліздерін дамыту, цифрландыру, логистиканы трансформациялау және «Бір белдеу — бір жол» бастамасы шеңберінде бірлескен инфрақұрылымдық жобаларды іске асыру.
«New Silk Way» платформасы Қазақстанның жаһандық логистикадағы ұстанымдарын нығайтуға және болашақтың жаңа еуразиялық бағыттарын қалыптастыруға бағытталған стратегиялық бағытын айқын көрсетеді.
