Жыл басынан бері елордаға қарасты темір жолда пойыз 15 рет мал қаққан
«Қазақстан теміржолшысы» газетінің тілшісі
Астана жол дистанциясының өндірістік-техникалық бөлім бастығы Әлішер Сыздық адамдардың бейғамдығы пойыздар қозғалысына үлкен қауіп төндіріп отырғанын айтады. Ол жыл басынан бері дистанцияға қарасты телімдерде жолға малдың шығып кетуіне байланысты оқыс тежеу беру жағдайлары жиілегенін, сондай-ақ, мал басу оқиғаларының 15 оқиғасы болғанын мәлімдеді. 13 сәуірде Макинка-Елтай аралығында №328 пойыз машинисі Ведутов 312 шақырымға келген кезде бір жылқының жолдан өтуіне байланысты оқыс тежеу берген. Ал түнгі бір шамасында болған оқиға кезінде пойыз малды басып кеткен. Сол жерге желілік тәртіп сақшылары, №1 өндірістік телім бастығы, жол шебері келген. Бірақ малдың иесі кім екенін анықтай алмаған. Дәл осындай оқиға 29 сәуірде 468 шақырымдағы 5 пикетте болып, тағы да жылқыны пойыз басып кетті.
«Жол бүлінбегенмен локомотив автотізбегі бүлінді. Мұның бәрі компанияға уақыт пен материалдық тұрғыдан шығын келтірді», – дейді Әлішер.
Жайнақ-Нұр-Сұлтан аралығында мамыр айында болған оқиға кезінде басылған жылқының иесі табылып, оған әкімшілік құқықбұзушылық бойынша хаттама толтырылған. Елордалық азамат малын қараусыз жібере салған. Мұндай оқиғалар маусым айында 4 рет, шілдеде 4 рет, тамызда 1 рет, қыркүйек айында 3 рет болыпты. Көп жағдайда жолға қараусыз ірі малдың шығып кетіп жататынын айтады теміржолшы маман.
«Біріншіден, малды теміржол маңайына жаяр болса, жолдан 300 метр әрі жаю керек. Теміржолдан 2000 метр қашықтықта жайылар болса, міндетті түрде мал қараусыз болмауы тиіс. Малды теміржолдан өткелдер, жол өтпелері, арнайы мал өтуге арналған жерлер арқылы ғана өткізу керек. Алайда, осы жерлердің өзінен малды тұман түскенде, нөсер жауында, боранда және түнде өткізуге болмайды», – дейді ол.