«Астана – Жітіқара» жаңа теміржол қатынасы іске қосылады
2023 жылдың 3 қыркүйегінен бастап «Жолаушылар тасымалы» АҚ «Астана – Жітіқара» жаңа теміржол жолаушылар қатынасын іске қосады. Бұл бағыт Қостанай облысы тұрғындарының өтініштері бойынша ұйымдастырылған, деп хабарлайды Rail-news.kz.
«Астана – Жітіқара» бағыты бойынша қайта отырғызусыз жүретін вагондар 104 орынға есептелген және күн ара қатынайтын болады: Нұрлы жол вокзалынан тақ күндері сағат 19:40-та жөнелтіліп, «Жітіқара» станциясына жұп күндері сағат 15:56-да келеді.
Жітіқарадан сағат 18:14-те жұп күндері кері қайтып, тақ күндері елордаға сағат 12:46-да келеді. Пойыз маршруты Көкшетау және Қостанай қалалары арқылы өтетін болады.
Жолаушылар пойыздарының қозғалыс кестесі бойынша анықтамалық ақпаратты «1433» тегін нөмірі және «KTZH_PP_BOT» Телеграмм боты арқылы алуға болады.