Жолаушылар вагоны жыл сайын жаңарып келеді

«Жолаушылар тасымалы» АҚ қолданыстағы жолаушы вагондары паркін жаңартуда жыл сайын жаңа қадамдар жасауда. 2010-2022 жылдар аралығында компания тарапынан 1224 вагон сатып алынса, оның 676 бірлігін Тальго вагондары құрайды. Бұл өз кезегінде парктің орташа тозу деңгейін 73%-дан 46%-ға дейін төмендетті.

Бүгінде Ұлттық тасымалдаушының жолаушылар вагон паркінде 2106 бірлікке жуық вагон бар, соның 32%-ның «жас» шамасы 20 жылдан жоғары. Компания паркті жаңарту жұмыстарын жалғастыруда. Мәселен, 2030 жылға дейін Stadler технологиясы бойынша 537 жоғары технологиялық жолаушылар вагонын сатып алу жоспарланған. Ал биыл жолаушылар вагон паркі 50 заманауи вагонмен толығатын болса, келесі жылы 100 вагон келіп қосылмақ.  

Ұлттық тасымалдаушының жалпы паркіндегі вагондардың 76%-ы ауа баптау жүйесімен жабдықталған. Вагондар паркінің 24%-ында, яғни 515 вагонда ауа баптағыш дайындаушы зауыттың конструкциясы бойынша қарастырылмаған. Мұндай вагондарда – авариялық жағдайларда ашылатын және Жолаушыларды, багажды, жүк-багажды және пошта жөнелтілімдерін тасымалдау ережелерінің және Техникалық пайдалану ережелерінің барлық талаптарына сәйкес келетін авариялық купелерден басқа барлық купелерде терезе ашу мүмкіндігі бар. Ауа баптау жүйесі жоқ вагондарға келсек, олар алдағы жылдары қызмет ету мерзімінің таяп қалуына сәйкес алып тасталынбақ.  

Әлеуметтік маңызы бар облысаралық қатынастар бойынша жол жүру тарифі инфляция деңгейінен төмен – 2023 жылғы 1 қаңтардан бастап 7%-ке ұлғайды. Теміржол билеттеріне сұраныс жаз маусымында және мереке күндері байқалады. «Жолаушылар тасымалы» АҚ пойыздарда орындар босаған жағдайда жолаушыларды бос орындармен қамтамасыз ету мақсатында bilet.railways. kz сайтында клиентке брондалған орындар фактісі туралы СМС жіберуді растай отырып, кезектілік тәртібімен билеттерді сатып алуға мүмкіндік беретін «Күту парағы» қызметін енгізді. Биыл жыл басынан бері «Күту парағы» қызметі арқылы 198 мың өтінім келіп түсіп, 69 мың жолаушы аталған қызмет көмегіне жүгіне отырып билет сатып алған.  

Сонымен қатар ұлттық тасымалдаушы 15-25 жас аралығындағы жолаушыларына «Жастар» дисконттық картасын ұсынып отыр. Бұл карта жастарға қала маңы қатынасындағы пойыздарға 25% көлемінде жеңілдікпен жүруге мүмкіндік береді.  

Ертеректе «Жастар» дисконттық картасының жеңілдігі Алматы 2 – Орал, Алматы – Петропавл, Алматы 2 – Маңғыстау, Атырау – Алматы 2, Нұрлы жол Астана станциясынан Шымкент бағытындағы коммерциялық пойыздарға таратылған болатын. Енді дисконттық карта жеңілдігі пилоттық режимде қала маңына қатынайтын пойыздарға 2023 жылдың 1 қыркүйегі мен 31 желтоқсаны аралығында қолданыста болады.  

Қазақстанда «Жолаушылар тасымалы» АҚ-дан басқа тағы 13 жеке тасымалдаушы теміржол көлігімен жолаушыларды тасымалдау қызметін көрсетеді.