Енді Өскемен - Астана пойызының жолаушылары үшін «Перроннан үйге дейін» қызметі қолжетімді болады

Биылғы жылдың 2 қарашасынан бастап «Жолаушылар тасымалы» АҚ «Перроннан үйге дейін» қызметін кеңейтіп, № 67 Өскемен-Астана пойызының жолаушыларына трансферді іске қосады. 

Енді осы пойыз жолаушылары жайлы да шағын автобуспен «Нұрлы жол» теміржол вокзалының перронынан өз үйіне (межелі пунктке дейін) жете алады. Тапсырыс берілген трансфер вокзал кешеніне келіп тоқтайды. Қызмет құны 850 теңгені құрайды.

Азаматтар жолаушылар вагондарындағы QR-кодты сканерлеп, қажетті мекенжайды көрсетіп, ақы төлеп қызметке тапсырыс береді. Сондай-ақ, жолаушылар веб-сайты арқылы вокзалдан үйге дейін трансферді өз бетінше шақырта ала алады. 

«Интермодальді қызметті пайдаланған жолаушылар көлік іздеу уақытын айтарлықтай қысқартып, межелі жеріне дейін ыңғайлы жетеді. Сондай-ақ, қызмет жолаушыларға «Есіктен есікке дейін» қағидаты бойынша жол жүруді қамтамасыз ете отырып, автобус және теміржол көліктерімен бір бағыт бойынша жол жүруді ресімдеуге мүмкіндік береді», – деді «Жолаушылар тасымалы» АҚ Бас директоры Жәнібек Тайжанов.

Айта кетейік, «Перроннан үйге дейін» қызметін №3 Алматы-Астана, №85 Шымкент-Астана, №67 Өскемен-Астана пойыздарының жолаушылары пайдаланады. Бұл қызмет интермодальды тасымалдауды дамыту бойынша жүргізіліп жатқан жұмыстар шеңберінде іске асырылады.