Мерекелік пойыздар мен ұлттық дәмдер жолаушыларға көтеріңкі көңіл-күй сыйлады
Наурыз мейрамын күндері Алматы вокзалынан ұлттық нақышта безендірілген №4/3 «Алматы – Астана» бағыты бойынша жүретін жолаушылар пойызы салтанатты түрде жолға шықты, деп хабарлайды Rail-news.kz.
Перронда жолаушыларды ұлттық киім киген жолсеріктер қарсы алып, наурыздың шуақты атмосферасын сыйлады.
Жолаушылар мен шығарып салушыларға қазақ халқының мәдении мұрасын насихаттайтын домбыра үнімен сүйемелденген музыкалық бағдарлама ұсынылды. Сонымен қатар, әр жолаушыға дәстүрлі тағамдар — наурызкөже мен бауырсақ тарту етілді.
Мерекелік нақышпен көмкерілген №7553/6811 «Қарағанды – Астана – Бурабай курорты» бағытындағы қала маңы электр пойызы да жолаушыларға мерекелік көңіл күй сыйлауда. Этностильде безендірілген осындай пойыздар 2025 жылдың наурызының соңына дейін қатынайтын болады.
Ұлттық мерекелерде жолаушыларды арнайы құттықтау – компания үшін дәстүрге айналған игі дәстүр. Жыл сайын «Жолаушылар тасымалы» АҚ түрлі мерекелерге орай пойыздарды тақырыптық безендіріп, жолаушыларға көтеріңкі көңіл-күй мен ұмытылмас әсер сыйлап келеді.
Айта кетейік, бұл мерекелік шара еліміздің барлық өңірлерінде өтуде. Пойыз бригадасы мен компания қызметкерлері жолаушыларды пойыз ішінде де, перронда да Наурыз мейрамымен шын жүректен құттықтауда.