Әке жолын қуған атыраулық ақ жаулықты бүгінде логистикаға ден қойды
Атырау облысы бойынша меншікті тілші
Темір жол саласының бір ерекшелігі – мұнда әулет кәсібін жалғастырушы династиялық дәстүр берік қалыптасқан. Біздің кейіпкеріміз Гүлнәр Нұрғалиева да аймаққа танымал жол шеберінің қызы.
Жол жөндеу жұмысының ең қиын сала екенін теміржолшылар жақсы біледі. Таңның атысы, күннің батысы, жыл он екі ай қос ішектей боп ұзыннан ұзақ шұбатылған жол бойында жүретін әкесі Өтеміс қызы үшін ең ұлы ұстаз болды. 1989 жылы мектепті үздік бітірген Гүлнәр әке ақылымен Гурьев темір жол техникумына оқуға түсіп, «Тасымалды ұйымдастыру» бөлімінде таңдаған мамандығына сәйкес білім алады. 1993 жылы алғашқы еңбек жолын «Ақжайық» станциясында жүк қабылдап-тапсырушы болып бастайды.
– Жастық шақ адамның батыл да батыр кезі ғой. Ақжайық станциясының жүк тасымалдау ережесіне сай тәртібін, сонымен қатар барлық салаларындағы жүк тиелу, қабылдау бойынша толты- рылатын құжаттардың рәсімін лезде үйрендім. Қазақстандағы үлкен өндірістердің бірі Атырау мұнай өңдеу зауыты шегінде орналасқан станцияда жүктердің тиелу процесін, тасымалдауға қабылдауға дейінгі жүргізілетін сараптама жұмыстарын көрдім. Сол кездері жас демей осы жұмыстарды үйретіп, мені баулыған теміржолшы аға-апаларыма алғысым шексіз. 2001 жылы Атырау темір жол бөлімшесінің актілі іздестіру және шағымды карау жүк бөлімінің инженері болып ауыстым. Алматыдағы көлік және коммуникация академиясының тасымалды ұйымдастыру бөлімінде сырттай оқып, өндірістен қол үзбей жоғары білім алдым, логистиканың қыр-сырына терең бойлап, өздігімнен білім көтеруге ұмтылдым. Өйткені болашақта теміржол үшін логистика саласы үлкен маңызға ие болатынын біз жақсы түсіндік, – дейді Гүлнәр.
2015 жылы Атырау жүк тасымалы бөлімшесінде жүк бөлімінің басшысы болып тағайындалған Гүлнар күні бүгінге дейін осы қызметті абыроймен атқарып келеді. Жүк тасымалын қазіргі талаптарға сай ұйымдастырып, олардың логистикалық дамуын және автоматтандырылу жүйесін енгізу шараларын әріптестерімен бірге атқарып келеді. Гүлнәр – түзде де, үйде де таразы басын тең ұстайтын, отбасының шырайын келтіріп отырған аяулы ана. Жолдасы Асылбек екеуі 2 бала тәрбиелеп өсіріп, бүгінде олардан немере сүйіп отыр.