Ата кәсіпке адалдық
«Қазақстан теміржолшысы» газетінің тілшісі
Ізбасар Қожақовқа теміржолшы кәсібі әке қанымен берілді десе болады. Бала кезден пойыз үнін құлаққа сіңіріп, болат жол бойында өскен Ізекеңнің ержеткенде шойын жол саласын таңдауы заңдылық еді.
Теміржолға алғаш із салған әкесі Әбдухамит осы салада тапжылмай 35 жыл еңбек еткен. Ол кешегі қанқұйлы соғысқа қатысқан қан майданнан елге аман оралған жауынгерлердің бірінен еді. Бейбіт заманда саналы ғұмырын темір жолға арнап, соғыстан кейінгі жылдары замандастарымен бірге еңбектің тайқазанын қайнатты. 1949 жылдан бастап Қарағанды өңіріндегі Теректі станциясын басқарды.
«Теміржолдың тыныс-тірлігі маған бала кезден таныс болды. Әкеме еріп теміржолға жиі барушы едім. Ол кездерде ауыр жұмыстың барлығы қолмен атқарылды. Жолшылардың шпал, рельс ауыстырып, вагоншылардың вагондарды тексеріп, пойыз құрастырушылардың қолдарына жалау алып, вагондарды алып, салып жатқанын, энергетиктердің баған басына шығып, ток желілерін жөндеп жатқанын көретінмін. Мұның бәрі нағыз еркектердің жұмысы болып көрінетін. Өскенде мен де әкем құсап, теміржолшы боламын деп шештім. Және сол сөзіме тұрдым. 42 жыл 3 ай осы таңдаған кәсібім бойынша еңбек етіп, міне зейнет жасына да жеттік», – дейді Ізбасар Әбдухамитұлы.
Кейіпкеріміз де әке ізімен жүріп, талай қызметтің тізгінін ұстады. 1984 жылы станция бастығы болды. Қарағанды жүк тасымалы бөлімшесіне қарасты Теректі станциясының жұмысын көтеріп, шағын болса да шаруасы шаш етектен бекетте пойыздардың қозғалысы қауіпсіздігін қамтамасыз етіп, өндіріс өрге бауына қызметін аямады.
Биыл көп жылғы еңбегінің зейнетін көруге құрметті зейнет жасына шыққан Ізбасар Әбдухамитұлы жұбайы Шәмші Ертісбаевамен бірге төрт баласы тәрбиелеп өсіріп жеткізді, бүгінде немерелердің қызығын көруде. Ал Ізекеңнің жолын ұлы Алмат пен қызы Қарагөз жалғастырып отыр. Ұлы Қоскөл станциясында станция кезекшісі, ал қызы Жезқазған станциясында станция кезекшісі жанындағы оператор. Олар теміржолшы мамандығын ата кәсіпке айналдырған әулеттің үшінші буыны. Ізбасар Қожақов өсіп келе жатқан немерелерінің де ішінен ата кәсіпке таңдау жасайтыны табыларына сенімді.