Құрыш жолдың майталмандарына мемлекеттік наградалар табысталды
«Қазақстан теміржолшысы» газетінің тілшісі
Бүгін «ҚТЖ» ҰК» АҚ Басқарма төрағасы Талғат Алдыбергенов Жұмысшы мамандықтары жылы аясында теміржолда көп жыл еңбек етіп, саланың дамуына сүбелі үлес қосқан екі теміржолшыларға Қазақстан Республикасы Президентінің Жарлықтарына сәйкес мемлекеттік наградаларды табыс етті. Олар Бақыт Тойбаев пен Мұратбек Сәрсенов.
Сонымен «Еңбек даңқы» ІІІ дәрежелі орденімен «ҚТЖ» ҰК» АҚ – «Магистральдық желі дирекциясы» филиалының «Ақтөбе магистральдық желі бөлімшесі» филиалына қарасты Орал сигнализация және байланыс дистанциясының СОБ электромеханигі Мұратбек Сәрсенов диспетчерлік қозғалысты басқару жүйелерін енгізу мен жаңғыртуға қосқан үлесі мен көпжылдық еңбегі үшін марапатталды. Ол темір жолға 30 жылға жуық уақыт еңбек сіңірген білікті маман әрі жастардың тәлімгері.
Ал саналы ғұмырының 41 жылын теміржолға арнаған «ҚТЖ» ҰК» АҚ – «Магистральдық желі дирекциясы» филиалының Автоматика, телемеханика және телекоммуникациялар департаментінің менеджері Бақыт Тойбаев инфрақұрылымдық жобаларды іске асыруға және Достық – Мойынты учаскесіндегі екінші жолдарды салуға қосқан елеулі үлесі үшін «Ерен еңбегі үшін» медалімен марапатталды.
Биыл Компания бойынша Жұмысшы мамандықтары жылы аясында барлығы 1975 қызметкер марапатталыпты. Оның ішінде салалық наградалармен – 1908 қызметкер, мемлекеттік наградалармен – 64 қызметкер, ведомстволықпен – 3 қызметкер марапатталған болатын.
Магистральдық дирекциясы үшін биылғы жыл маңызды оқиғалар мен мәнді жобаларға толы болды. Атап айтсақ, Алматы қаласында жобалық-конструкторлық бюро мен өңірлік архив ашылды. Достық – Мойынты учаскесіндегі екінші жолдардың ашылуы болды. Бұл жобаға дирекция мамандары ерекше үлес қосты.
