Теміржолшы Тамара зейнетке шықты

«ҚТЖ» ҰК» АҚ – «Тасымалды басқару дирекциясы» филиалының ұжымы қырық жылдан астам уақыт темір жолда үздіксіз еңбек еткен тасымалдауды үйлестіру тобының менеджері Тамара Волобуеваны зейнет демалысына шығарып салды.  

Тамара Леонидқызы – алғаш еңбек жолын Тың темір жолында станция операторы болып бастап, қозғалыс шаруашылығы саласының барлық сатысынан өткен маман. 20 жылдан астам уақыт диспетчерлік аппаратта пойыз диспетчері және желілік деңгейдегі диспетчер қызметін атқарды.

Жұмыс істеген жылдары ол өзін білікті маман, тәжірибелі де  талапшыл тәлімгер ретінде көрсетті. Ізін басқан жас әріптестеріне керек жерінде талапшыл, керек жерінде қолдаушы болды, еңбек қоржынындағы мол тәжірибесімен бөлісті. Қай  мәселеде де әділ болуға тырысты. Өз ісіне мығым, кәсібіне адал Тамара Леонидовна   ұжымы мен басшылықтың сенімі мен үлкен құрметіне ие болды.  

Оның алып салаға сіңірген адал еңбегі ескерусіз қалмай, әр жылдары «ҚТЖ» ҰК» АҚ басшылығы тарапынан алғыс хаттармен және құрмет грамоталарымен марапатталды.

– Темір жол – көптеген адам несібесін тапқан, көптеген адамның мансаптық жолында бағын ашқан құтты сала. Менің де өмір жолым темір жолмен тығыз байланысты болды. Қырық жыл бұл бір адамның ғұмыры десе де болғандай. Теміржолшы болғаныма еш өкінген емеспін. Бүгін көп жылғы еңбегімнің зейнетін көретін жасқа келіп, демалысқа шығып отырмын. Мен үшін бұл – өмірдің жаңа кезеңінің басталуы. Менімен бір жағадан бас, бір жеңнен қол шығара еңбек еткен темір жолдағы барлық әріптестеріме, құрметтеп шығарып салып жатқан ұжымыма, басшылығыма үлкен алғысымды айтамын, – деді кейіпкеріміз.  

Әріптестері де Тамара Леонидқызына маман ретінде Компанияның дамуына қосқан өлшеусіз үлесі мен жоғары кәсібилігі, ал адам ретінде адалдығы бен адамгершілігі үшін шынайы алғыстарын білдіріп, жаңа өмір кезеңі жаңа мүмкіндіктерге толы болуына сәттілік тіледі.