Тәжірибелі тәлімгер
«Қазақстан теміржолшысы» газетінің тілшісі
Қарағанды вагон пайдалану депосына қарасты Қызылжар станциясының аға вагон қараушысы Бақыт Әбіловтің жұмыс істеп жатқанына отыз жылға таяған. «Адал еңбегі үшін» төсбелгісінің иегері осынау жауапты да қауіпті кәсіптің ыстық-суығына төзіп, әбден шыңдалған.
«Әке көрген оқ жонар» демекші, Бақыттың теміржолшы мамандығын таңдауына тікелей әкесі ықпал етті деуге болады. Әкесі Рымтай Әбілов те теміржол саласында 43 жыл тер төгіп, жасы келгенде зейнетке шығыпты.
– Теміржолшы мамандығы ұқыптылық пен дәлдікті қажет етеді, ал біздің жұмысымыз – вагондардың техникалық жағдайын бақылау және қандай да бір ақау табылып жатса, ағытып алып техникалық қызмет көрсету пунктінде жөндеу жүргізу. Осылайша бізге пойыздар қозғалысының қауіпсіздігін қамтамасыз ету сияқты өте жауапты міндет жүктеледі. Жыл он екі ай Қызылжарға келіп-кетіп жатқан сансыз құрамдардың вагондарын тексеріп, кем-кетігін жөндеп, қозғалыс қауіпсіздігіне өз үлесімізді қосамыз, – дейді аға вагон қараушы-жөндеуші.
Иә, күн-түні өтіп жататын сан мыңдаған вагондар Бақыт бастаған бригаданың назарынан тыс қалған емес. Соңғы уақыттарда ара-тұра кішігірім ақаулардың табылып жатқаны болмаса, аса апатқа немесе басқалай ауыр жағдайларға әкелетін үлкен ақаулар кездескен емес. Оның себебін жолаушылар және жүк вагондары парктерінің жылдан жылға жаңаруымен де байланыстыруға болады. Тәжірибелі маман ауысымның аға вагон қараушы-жөндеушісі болуымен қатар өзінен кейінгі жастардың тәлімгері ретінде танымал. Аптаның бір күнін жастарға арнап, өз тәжірибесімен бөлісіп, үйретуден жалыққан емес.