Қырық жыл – қас-қағым сәт

Теміржолшы мамандығы – тәртіп пен нақтылықтың, өз ісіне адалдықтың айқын көрінісі. Осындай қасиеттерді зейнетке шығып жатқан Нәби Әбдиевтің бойынан да байқауға болады.

Ақтөбе өңірлік ақпараттың есептеу орталығының Қандыағаш станциясындағы ОПЛП бөлімі бастығы Нәби Тілепбайұлы жастық шағында көңіл қалауымен таңдаған мамандығына 40 жыл адал қызмет етті.  

Нәби Тілепбайұлы 1963 жылғы 27 ақпанда Ташкент қаласында дүниеге келген. 1985 жылы Ташкент теміржол көлігі инженерлері институтын «Автоматика, телемеханика және байланыс» факультеті бойынша «инженер-электрик» мамандығымен тәмамдады. Сол жылы еңбек жолын Нүкіс станциясындағы ШЧ-17 мекемесінде бастады. 1985–1987 жылдары кеңес әскері қатарында болып, елге келген соң теміржолға қайта оралды. 1992 жылы аға механик болып бастап учаске бастығы қызметіне көтерілді.  

2002 жылы тарихи отаны Қазақстанға қоныс аударды. 2003 жылдан бастап оның еңбек жолы Ақтөбе өңірлік ақпараттық-есептеу орталығымен тығыз байланысты. Алдымен инженер-технолог, ал 2004 жылы Қандыағаш станциясындағы сұрыптау станциясын басқарудың автоматтандырылған жүйесі бөлімінің басшысы болып тағайындалды. Осы қызметті бүгінгі күнге дейін табысты атқарып келді. Оның тікелей жетекшілігімен станцияда маңызды цифрлық жобалар, соның ішінде ауқымды «АСУ Узел» жүйесі енгізілді. Нәби Тілепбайұлының жоғары біліктілігі мен жауапкершілігі бірнеше мәрте жоғары бағаланып, Бас есептеу орталығы тарапынан алғыс хат пен түрлі марапаттарға ие болды. Қазақстан темір жолының 120 жылдығына орай мерейтойлық медальмен және атаулы сағатпен марапатталды.  

Нәби Тілепбайұлы үшін отбасының орны бөлек. Жұбайымен бірге үш ұл тәрбиелеп өсірді. Екі ұлы бүгінде әке ізімен теміржол саласында еңбек етіп жүр. Мұндай сабақтастық – мамандыққа деген адалдықтың жарқын көрінісі екені даусыз.  

Әріптестері Нәби Абдиевті зейнет жасымен құттықтап, кәсіподақ ұйымының қолдауымен тарту таралғылар табыстап үлкен құрметпен лайықты демалысқа шығарып салды. «Сіздің өмір жолыңыз – жас ұрпаққа ең басты құндылықты, яғни туған ел игілігі үшін адал еңбек етуді үйреткен тұлғаның бейнесі. Қырық жылғы бейнеттің зейнетін көріңіз» деген ізгі тілектерін білдірді. Ал кейіпкеріміз қырық жыл уақыттың қас-қағымдай уақытта өте шыққанын айтады...