Заман көшінен қалмаған теміржолшы

Вагон шаруашылығының жетекші инженері Бимұқанбет Қайырбекұлы – бұл саланың қыр-сырын жылдар бойы меңгерген маман. Теміржолшының айтуынша, бұрын өндірісте маманның жылдар бойы жинаған тәжірибесі шешуші роль атқарса, бүгінде заманауи технологияның ықпалы мол.

Жаңа жүйелердің міндеті адам еңбегін алмастыру емес, теміржолшының жұмысын дәл әрі қауіпсіз ету деп санайды. Дегенмен, технологияның дамуы теміржолшы еңбегін жеңілдеткенімен, жауапкершілікті азайтқан жоқ, керісінше, қауіпсіздікке қойылатын талап күшейе түсті деген пікірде.  

Оның еңбек жолы 1998 жылы басталған, отыз жылға жуық тәжірибесі бар. Вагон қараушыдан бастап вагон депосында нұсқаушы, кейін оқыту шебері болды. Өзі үйренгенді кейінгі буынға үйретті. 2010-2015 жылдары Ақтөбе станциясында басқарушы қызмет атқарып, теміржол жұмысын ұйымдастырушылықта мол тәжірибе жинады. Кейін Ақтөбе бөлімшесінде қауіпсіздік бойынша инспектор болып еңбек етті.  

Бүгінде Бимұқанбет Қайырбекұлы – Батыс өңірлік пойыздар қозғалысын басқару орталығының вагон шаруашылығы мекемесінде жетекші инженер. Оның қазіргі жұмысы Батыс өңіріндегі вагон шаруашылығының тұрақты әрі қауіпсіз жұмысын ұйымдастырумен байланысты. Жетекші инженер қызмет атқаратын бөлімде тағы үш инженер және КТСМ жұмысын бақылап отыратын бес диспетчер бар. Олар пойыздардың қозғалысы кезінде вагондардың техникалық жағдайын бақылауда ұстайды.  

– Батыс өңірі бойынша жұмыс істейміз. Орал, Қандыағаш, Қазалы, Маңғыстау және Атыраудағы бес вагон пайдалану депосының жұмысын ұйымдастырамыз. Құжаттардың реттелуі мен уақытында жеткізілуін қамтамасыз етеміз. Вагон шаруашылығына да заманауи технологиялар келді. КТСМ арқылы көптеген жұмыс автоматтандырылды. Енді станцияға кірмей-ақ вагонның ақауын анықтауға мүмкіндік бар. Теміржол саласына енгізіліп жатқан жаңа технологиямен жұмыс істеуге, өндіріске енгізілген әрбір жаңа құрылғыны зерттеп үйренуге асықпыз. Өйткені бүгінде тек тәжірибемен алысқа бармайсың, заман көшіне ілесе білу қажет. Яғни заманауи құрылғылар мен цифрлы технологиясыз бір қадам да алға жылжу бүгінгі заманда мүмкін емес, – дейді тәжірибелі маман.  

Батыс өңірлік пойыздар қозғалысын басқару орталығының басшысы Дархан Құланбаев биыл кейіпкерімізді теміржол саласына қосқан үлесі үшін Алғыс хатпен марапаттады.