Шымкентте көктемгі комиссиялық тексеріс жүріп жатыр
Шымкент жүк тасымалы және Шымкент магистралдық желі бөлімшесі бойынша 10-шы сәуірден басталған көктемгі комиссиялық байқау екі аптаға созылмақ.
№1214-И телеграфтық нұсқауға сәйкес Түркістан облысы мен Шымкент қаласы аумағында теміржол объектілерін тексеріп, жазғы тасымалға дайындық жүргізу үшін құрылған арнайы комиссияға екі құрылымдық бөлімшенің бірінші басшылары мен орынбасарлары, бас инженерлер, техникалық бөлім жетекшілері, ревизорлар тағы басқа мамандар кірді.
– Техникалық байқаудың негізгі мақсаты – мезгіл ауысып қыстан жазға, жаздан қысқа ауысқан сайын теміржол шаруашылығының жұмысқа жарамдылығын тексеру, жазғы немесе қысқы тасымалға дайындығы мен қауіпсіздігін зерделеу, ақаулары болса жөндеу жұмыстарын жүргізу болып табылады. Ең бастысы жолаушы мен жүк тасымалының басым бөлігін қамтамасыз етіп отырған Қазақстан темір жолының қауіпсіз, тоқтаусыз әрі сапалы жұмысын жолға қою. Бұл біздің – теміржолшылардың негізгі міндеті, – дейді Шымкент магистралдық желі бөлімшесінің директоры Алғазин Қойлыбаев.
Бірнеше бағытта аймақтағы ірілі-ұсақты станцияларды сүзіп шығып, тиянақты тексеру жұмыстарын жүргізген комиссиялық топ өткен жұма күні Түлкібас станциясында жұмыстарын жалғастырды. Тексеру қорытындысы бойынша тыңдау 25-сәуірде өтетін болады.