Экология қауіпсіздігі талқыланды

Ұлттық компанияның бас инженері – Техникалық саясат департаментінің директоры Батыр Котыревтің төрағалығымен желілік, өңірлік басқару деңгейлерінің жоғары басшыларының қатысуымен өнеркәсіптік қауіпсіздік мәселелеріне қатысты бейне-селекторлық кеңес өтті.

Мұндай кеңестер ай сайын әртүрлі тақырыптарда – еңбек қауіпсіздігі және еңбекті қорғау, өнеркәсіптік және электр қауіпсіздігі, сондай-ақ экологиялық қауіпсіздік мәселелері бойынша өткізіліп тұрады. Бұл жолы негізгі тақырып экологиялық қауіпсіздікке арналды.  

Осы жылдың сегіз айында Еңбек және экологиялық қауіпсіздік инспекциясы Ақмола, Қарағанды және Алматы облыстарындағы Компанияның құрылымдық бөлімшелері мен еншілес ұйымдарында өнеркәсіптік қауіпсіздік мәселелері бойынша жоспарлы тексерулер жүргізді. Тексеру барысында анықталған кемшіліктерге жасалған талдау, желілік кәсіпорындарда табиғатты қорғау қызметіндегі бұзушылықтардың қайталануын көрсетті. Яғни, жиі анықталған бұзушылықтарға келсек, олар экологиялық қауіпсіздік бойынша нормативтік-техникалық құжаттаманы сапасыз жүргізу; әртүрлі қалдықтарды сақтау шарттарының орындалмауы; қалдықтарды жинауға арналған контейнерлердің және арнайы жабдықталған алаңның болмауы; экологияны қорғауға қатысты қызмет көрсетуге шарттардың уақытылы жасалмауы; экология бойынша оқыту сабақтарының дер кезінде өткізілмеуі еді.  

Кейбір бөлімшелерде күл мен қож қалдықтарын сақтауға арналған арнайы бөлінген алаңдардың болмауы, тиісінше өндіріс қалдықтарын жер бетінде сақтау сияқты бұзушылықтар, сондай-ақ қоршаған ортаны қорғау саласындағы уәкілетті органға есептілік деректерін уақытылы ұсынбау және қоршаған ортаға эмиссияларға рұқсат алу бойынша шаралардың дер кезінде қабылданбауы сияқты фактілер анықталды. Ал өз кезегінде Қазақстан Республикасының табиғатты қорғау заңнамасы талаптарының бұлайша бұзылуы бақылаушы мемлекеттік органдар тарапынан ірі көлемдегі айыппұлдар салу қаупіне әкеп соғуы мүмкін екенін ұмытпаған жөн.  

Осыған орай «ҚТЖ» ҰК» АҚ басшылығы Компанияның құрылымдық бөлімшелері мен еншілес ұйымдарының жетекшілеріне экологиялық қауіпсіздікті қамтамасыз ету бойынша жұмысты күшейтіп, анықталған бұзушылықтарды барынша азайту шараларын қабылдау қажеттігін ескертті.