Темір жолға жақын жердегі су қоймалары мен бөгеттер тексеріледі

Су тасқыны кезеңі басталғанға дейін ҚТЖ аумақтық ұйымдармен бірлесіп теміржол төсемінен жоғары орналасқан бөгеттер мен су қоймаларының жай-күйін тексереді. Қазақстан бойынша барлығы 83 нысан бар.

Қардың еруі кезеңінде су шаруашылығы объектілері теміржолшылар бақылауында болады.

Көктемгі тасқындарға қарсы іс-шараларға ҚТЖ алдын ала дайындалады. Еріген суларды өткізу үшін 10 000 жуық көпір, құбыр қардан тазартылып, шамамен 2600 шақырым кюветтер мен таулы арықтар аршылады. Мұзды ұсақтау және қар көшкінін түсіру бойынша бұрғылау-жару жұмыстары жоспарланған.

Су тасқыны кезінде инфрақұрылымның шайылып кетуінің, бүлінуінің алдын алу және салдарын жою үшін жол шаруашылығының теміржолшылары 45 арнайы шайып кетуге қарсы пойыздарды қалыптастыруға кірісті. Олар кесек тастармен, қиыршық тастармен, рельс пакеттерімен, кондициоланбаған темірбетон шпалдармен, апаттық бригадаларға арналған құралдармен және арнайы киімдермен жабдықталған.

Елдің оңтүстігінде, батысында және шығысында арнайы пойыздар наурыз айында дайын болады. Солтүстік аймақта олар 1 сәуірге дейін қалыптасады. Арнайы пойыздар ықтимал қауіпті учаскелерге мүмкіндігінше жақын станцияларға орналастырылады. Қажет болған жағдайда тәуліктің кез келген уақытында су шайып кетуге қарсы пойыздар еріген судың алдын алуға және су тасқынының өту салдарын жоюға бағытталатын болады.