Еңбек ұжымдарына үндеу
«Қазақстан темір жолы» ҰК» АҚ басқарма төрағасы Талғат Алдыбергенов еңбек ұжымдарына арнап үндеу жасады.
Қадірлі әріптестер!
Бүгінде «Қазақстан темір жолы» ҰК» АҚ алдында бүкіл Еуразиялық транзиттің болашағын айқындайтын міндеттер тұр. Біз болат магистральдарды басқарып қана қоймай, еліміздің транзиттік әлеуетін күшейтіп, озық цифрлық технологияларды енгізіп, инфрақұрылымды ауқымды түрде жаңғыртудамыз. Алайда барлық экономикалық көрсеткіштер мен пайданың артында талқылауға жатпайтын құндылық – адам өмірі тұр.
Экономикалық көрсеткіштер адам өмірінен жоғары болмауы тиіс. Біздің компанияның басты құндылығы – біздің қызметкерлеріміз. Сондықтан еңбек қауіпсіздігі мен әрбір қызметкердің денсаулығы басты басымдық болып қала береді.
Бұл қағидат басқару стратегиясының негiзiнде жатыр. ҚТЖ-ның басты мақсаты – жарақаттануды болдырмау. Бұл жай ғана ұран емес, жүйелік тәсілді және әркімнің жеке қатысуын талап ететін қолжетімді міндет.
Біз, нөлдік жарақат – әрбір қызметкер өзінің де, әріптестерінің де қауіпсіздігі үшін жеке жауапкершілікті сезінген жағдайда ғана мүмкін болатынына сенімдіміз. Ол үшін ҚТЖ құндылықтарды декларациялап қана қоймай, нақты тетіктерді енгізеді:
• Қауіпті жұмысты тоқтат
Осы қағидатты қолдану практикасын кеңейту әрбір қызметкерге, егер ол оны қауіпсіз емес деп санаса, тәртіптік салдардан қорықпай, кез келген процесті тоқтатуға сөзсіз құқық береді. Бұл – өндірістегі өмірді қорғаудың ең қуатты кепілі.
• Көшбасшылық және мотивация
Барлық деңгейдегі басшылар өздерінің көшбасшылығын жеке үлгі және әділ мотивация арқылы нығайтады. Біз үздік әлемдік тәжірибені енгізіп, еңбек ұжымдарымен бірге қауіпсіздік мәдениетінің жалпы деңгейін арттырамыз.
• Жүйелі оқыту, тәжірибе алмасу және тәлімгерлік
Біз күш-жігерімізді қауіпсіздік саласындағы үздік тәжірибелерді, соның ішінде халықаралық әріптестермен белсенді ынтымақтастықты жүйелі түрде оқытуға және алмасуға бағыттаймыз. Тәлімгерлік институты енгізілуде. Қауіпсіздік – бұл үздіксіз жетілдіру процесі.
• Тәуекелдер мониторингін дамыту
Цифрландыруға және жасанды интеллект енгізуге бүгінгі инвестициялар тасымалды жеделдетуге ғана емес, бірінші кезекте персонал мен активтерді қорғауға да бағытталған.
Біздің мақсатымыз – темір жолды Еуразиядағы ең қауіпсіз, ең сенімді және ең тиімді көлік жүйесіне айналдыру.
Баршаңызды өзіңізді және әріптестеріңізді сақтауға, кәсіби және қауіпсіз жұмыс істеуге шақырамын! Қауіпсіздікті қамтамасыз ету – бұл жай ғана нұсқауларды орындау емес. Бұл – өз отбасына, жақындарына және біздің Компанияның болашағына қамқорлықтың жоғары көрінісі.
Біз елдің көліктік қуатын нығайтуды жалғастырамыз, бірақ табыс тоннамен және триллиондармен емес, сақталған өмірмен өлшенетінін үнемі назарда ұстаймыз.
Талғат Алдыбергенов,
«Қазақстан темір жолы» ҰК» АҚ басқарма төрағасы