Теміржолда тәртіп бұзғандар жазаланды
Көлік полицейлері теміржол қауіпсіздігін сақтамаған азаматтарды анықтап, жауапкершілікке тартқандарын мәлімдеді, деп хабарлайды Rail-news.kz.
Жыл басынан бері 37 мыңнан астам жүргізуші теміржолды белгіленбеген жерден кесіп өткені үшін әкімшілік жауапқа тартылған. Мұндай әрекеттер қайғылы оқиғалардың басты себептерінің бірі саналады.
«Осы жылдың тоғыз айында пойыздардың 1441 рет шұғыл тежелу жағдайы тіркелді. Оның ішінде 274 жағдайда адамдар қауіпсіздік ережелерін елемей теміржол бойында жүрген, ал 1127 рет пойыз жолына үй жануарлары мен түрлі бөгеттер шыққан», - делінген хабарламада.
Халық арасында түсіндіру және алдын алу шаралары тұрақты түрде жүргізіліп жатқанына қарамастан, жарақат алу деректері әлі де кездеседі. Мас күйде немесе белгіленбеген жерден өту сияқты әрекеттер негізгі қауіп көзі болып отыр.
Тек өткен демалыс күндері ғана Астана, Тараз, Қызылорда және Шымкент станцияларында бес қауіпті жағдай тіркелген. Барлық оқиғада азаматтар теміржолды рұқсат етілмеген жерден кесіп өткен. Машинистердің дер кезінде әрекет етуі қайғылы жағдайдың алдын алған.
Қазіргі таңда барлық құқық бұзушылар әкімшілік жауапкершілікке тартылды. Көлік полициясы мен теміржол мекемелері түсіндіру жұмыстарын жалғастырып жатыр.
Полицейлердің айтуынша, теміржолдағы қауіпсіздік ережелерін бұзу – өз өміріңізге төнген нақты қауіп. Сондықтан азаматтардан тәртіп пен сақтықты қатаң ұстану талап етіледі.