30 жыл бұрын Маңғыстаудан Мәскеуге пойыз қатынаған екен
Маңғыстау облысы бойынша меншікті тілші
Күні кеше Маңғыстау жұртшылығы өз тарихында тұңғыш рет су жаңа жолаушы пойызына ие болып, жаңа вагондардан жасақталған «Маңғыстау – Алматы» жолаушы пойызы жолға шыққаны белгілі. Ал осыдан отыз жыл бұрын қарт Маңғыстаудан Мәскеуге алғашқы жолаушы пойызы аттанған еді. Түкпірдегі түбек халқы үшін бұл айтулы оқиға болған. Сол кездегі алып материктің біраз бөлігін билеп отырған КСРО орталығы, Ресейдің бас қаласы Мәскеуге қатынайтын жолаушы пойызы 1990 жылдың 29 маусымы күні аттандырылған болатын. Вокзал алдына халық көп жиналып, сол уақытта қалыптасқан дәстүр бойынша жаңа бағыттағы пойызды шампан атып жолға шығарып салған. Бір қызығы, бұл пойыздың алғашқы әрі ең бірінші жолаушысы да теміржолшы болыпты. Ол – осы пойыздың №1 билетімен жолға шыққан Сұлу Асқарқызы. Маңғыстау станциясында 32 жыл еңбек еткен ол қазір зейнеткерлік демалыста. Түбек теміржолының құрметті ардагері Амандық Алдабергеннің жары, тұтас бір теміржолшылар әулетінің анасы. Алғашқы билетті сатып алған жолаушы ретінде апамызға тепловоз маңдайына шампан шөлмегін шағу құрметі бұйырыпты. Пойызды алғашқы сапарға Маңғыстау теміржол бөлімінің бастығы Қыдыр Қалағанов, вокзал бастығы Қалжан Найманова бастаған Маңғыстау жұрты ақ жол тілеп, шығарып салды. Бірақ бір-екі жылдан соң КСРО таратылып, одақ теміржолымен байланыстар үзіле бастаған соң Мәскеуге қатынайтын пойыз да жүрісін тоқтатқан екен.