Майталман теміржолшы Әнуарбек Ыбыраевтың құрметіне ескерткіш тақта орнатылды
Қызылорда облысы бойынша меншікті тілші
Бәйгеқұм станциясын жиырма жыл басқарған еңбек және тыл ардагері, майталман теміржолшы Әнуарбек Ыбыраевтың құрметіне станция ғимараты қабырғасына мемориалдық тақта орнатылды.
Ескерткіш тақтаның ашылу салтанатына жиналғандар сұрапыл соғыс жылдары еңбек жолын бастаған майталман теміржолшы жайлы естеліктерімен бөлісті. Бұл станция ғимаратына аймақ бойынша орнатылып тұрған алғашқы мемориалдық тақта екен.
– Әнуарбек ақсақалмен бірге жұмыс істеу біздер үшін мақтаныш. Қарап отырсам, ол кісімен бірге жұмыс істегендердің өзі саусақпен санарлық қалыппыз. Ол кезеңде темір жолдағы негізгі жұмыс жалаң қолмен атқарылатын, қарапайым бағыттамалық бұрманың өзін ауыстырып тұратын арнайы жұмысшы болды. Оның барлығы қазір автоматтандырылып, бір нүктені басу арқылы орындалып жатыр. Әнуарбек ағаның ұйымдастырушылық қабілеті өте жоғары еді, халықпен сөйлесе білуі, ситуациялы жағдайларда оңтайлы шешім тауып, тараптарды келісімге келтіре білетін қасиеті ерекше болды. Тарлан теміржолшының 100 жылдығына орай осындай өнегелі істі қолға алған бөлімше басшылығы мен жергілікті атқарушы орган өкілдеріне, әке жолын жаңғыртып жатқан ұрпақтарына рахмет айтамын, – деді Әнуарбек қарияның шәкірті, зейнеткер Аймахан Қойшиев.
Әнуарбек Ыбырайұлы 1926 жылы 5 мамырда Қызылорда облысы Шиелі ауданы Жаңатұрмыс ауылында дүниеге келген.
1943 жылы еңбекке араласып, 17 жасында Шиелі станциясында жол бұрушы болып бастайды. Соғыс біткен соң білім алып, Қызылорда бөлімшесінде кезекші, пойыз диспетчері, Бәйгеқұм және Тереңөзек станцияларын басқарды. 1968-1980 жылдары Бәйгеқұм станциясын басқаруға екінші рет тағайындалып, барлығы 20 жыл өмірін осы бекеттің дамуына арнаған.
– 1986 жылы 40 жылдан астам еңбек етіп, үлкен абыроймен зейнетке шықты. Көпжылдық еңбегі үшін «Еңбек ардагері», «Қозғалыс қызметінің үздігі», «За трудовое отличие» және басқа да марапаттарға ие болған. Әкеміз бізге ең алдымен еңбекқорлық пен адалдықты үйретті, – дейді әке жайлы толғаныс сөзінде қызы Райхан.
Ұрпағына адал еңбек пен адамгершілікті мұрат еткен Әнуарбек Ыбырайұлының есімі сыр бойында мәңгі жасай бермек.
