Көзжұмбайлық қатерге ұрындырады

Теміржол – ыңғайлы және қолжетімді көліктердің бірі. Оны күнделікті миллиондаған адамдар пайдалануда. Өкінішке орай, темір жол көлігінің дамып, жылдамдығының өсуі жолаушылардың жолда жүру уақытын азайтып, жүктің жеткізілуін тездеткенімен, адамдарға қауіп төндіретін проблемаларды да қоса тудыруда.

Әсіресе, ең басты кедергі адамдардың жауапсыздығы болып отыр. Ата-ананың бақылауын сезінбеген балалар темір жол арасын кезіп, вагондардың үстіне шығып, шойын жолды ойынға айналдырады. 

Оған көз жұма қараған үлкендер әрекеті теміржол бойында орын алып отырған бақытсыз оқиғаларға себеп болуда. 

Теміржолшылардың айтуынша, адамдар теміржолға қатысты қауіпсіздік ережелерін сақтамайды. Арнайы аспа көпірді пайдаланбай, асығыс айналып өте салады және балалардың теміржол маңында ойнап, кетіп бара жатқан пойызға тас лақтырып, жолға бөгде зат қойып, бұзақылық істерге баруына «қайтер дейсің» деген көзжұмбайлықпен қарап, жағдайды одан әрі ушықтырып отыр. 

Бәрімізге белгілі, жүріп келе жатқан пойыз оқыс тежеу берсе де бірден тоқтауы мүмкін емес, пойыздың салмағына, жылдамдығына байланысты ең кемі 500-1000 метрдей жүріп барып тоқтайды. Жылдамдығы 100-120 км/сағ жүріп келе жатқан пойыз секундына 30 метр жерді жүріп өтетінін ескерсек, жолаушының жолды кесіп өтуіне 5-6 секундтай уақыт кетеді. Өкінішке орай, жас жігіттер мен бойжеткендер темір жолдан кесіп өтіп жатса да құлағынан құлаққаптарын шешпей, локомотивтің дауысын естімей, пойыздың астына түсіп қалған оқиғалар аз емес.

Дегенмен, биыл Түркістан станциясында жыл басынан бері сегіз ай ішінде өндіріске қатысты Н-1 және Н-2 жұмысшылары арасында жолдарда ешқандай да жарақат алу оқиғасы тіркелмеген. Бұл, әрине, теміржолшылардың тиянақты жұмыстарының нәтижесі деп айтуға болады. Өйткені, бүгінде жол бойын мал мен жаннан қору теміржолшылардың тағы бір міндетіне айналған сияқты. Бір қарағанда, жай тұрған вагондар қауіп төндірмейтін сияқты.

Алайда, ереже бойынша тұрған вагонға 5 метрден кем арақашықтықта жақындауға, астынан өтуге болмайды. Өйткені станцияда тұрған әрбір вагон жұмыс үстінде деп есептеледі. Әр секундта ол қозғалысқа келуі мүмкін. Вагонның екпінімен немесе бір жеріне киімі ілініп қалса, адамды дөңгелек астына тартып әкетеді. Әсіресе қарсы бағытталған жылжымалы құрамалардың арасында қалып қою өте қауіпті екен – Өйткені, қарсы бағыттағы құрамалар тудырған ауаның ағыны 16 тоннаны құрайды. Мұндай жүктеме адамды пойыз астына жұлып әкетеді. Сондықтан, уақытты қысқарту үшін өзіне ыңғайлы жерден өте салу дегенді қою керек халық. Теміржолды арнайы белгіленген орындардан ғана өту керек. Аспа көпірлер арқылы қауіпсіз өтуге болады. Ал ондай көпір жоқ жерде темір жолды кесіп өтуге арнайы төсемелерді пайдалану керек, – дейді Түркістан станциясының еңбек қорғау инженері Ләззат Рысбаева. 

Иә, адам өмірінен қымбат не бар? Сондықтан, көзжұмбайлық қатерге ұрындырмасын десек, темір жолдың қауіпті аймақ екенін ешқашан ұмытпаған жөн.