Астанада қозғалыс қауіпсіздігі бойынша байқау өтті
Қозғалыс қауіпсіздігі аясында Астанада өткен үш күндік байқау сала мамандарының өзара тәжірибе алмасу алаңына айналды.
Компания басшысының орынбасары Марат Шәкеновтің қолдауымен өткен ауқымды іс-шараға 12 өңірден командалар қатысып, жаңа жобаларды талдап, интеллектуалдық ойындар мен тренингке қатысып, кәсіби дағдыларын шыңдады.
Үш күнге созылған басқосуда қауіпсіздік талаптарын жетілдіру, төтенше жағдайлардың алдын алу, қозғалыс қауіпсіздігі мәдениетін көтеру бағытында бірқатар маңызды мәселелер талқыланды. Сарапшылар өз баяндамаларында цифрландыру, ақпараттық бақылау жүйелерін жетілдіру және адам факторының тәуекелдерін азайту жолдарын атап өтті. Компанияның жетістігі экономикалық көрсеткіштерден бөлек қозғалыс қауіпсіздігі деңгейімен де өлшенетіні ақиқат. Сондықтан басқосуда талқыланған басты мәселенің бірі – бөлімшелерде әлі күнге дейін қолданылып жүрген ескі құрал-жабдықтарды заманауи цифрлық жүйелерге көшіру болды. Қатысушылар бұл бағытта өз ұсыныс-жобаларын ортаға салып, нақты шешімдер бойынша пікір алмасты.
Алматы өңірінен барған команда бұл бастаманы жоғары бағалап, осындай іс-шараларды қолдап, әрі қарай дамыту, жыл сайын өткізуді жолға қою қажет деп санайды. Ортақ ой, ортақ шешім тоғысқан жерде қозғалыс қауіпсіздігіне қатысты түйінді мәселелердің де шешімін табудың жолы табылатыны талас тудырмайды.
Жаслан БЕКЕШЕВ,
қозғалыс қауіпсіздігі маманы,
Алматы